Олунньу 16 күнүгэр, Ньурба улууһугар Саха Өрөспүүбүлүкэтин ааспыт сыллааҕы үлэтин отчуота саҕаланна. СӨ Бырабыыталыстыбатын оробуочай бөлөҕүн Бырабыыталыстыба Бэрэссэдээтэлин солбуйааччыта Сергей Местников баһылыыр-көһүлүүр.
Нэһилиэктэринэн кэрийэн үлэни отчуоттуурга 3 бөлөх тэриллэн үлэлиир. Бастакы бөлөҕү — Сергей Васильевич бэйэтэ, иккис уонна үһүс бөлөхтөрү туһааннааҕынан тыа хаһаайыстыбатын уонна ас-үөл бэлиитикэтин миниистирэ Артем Александрович Александров, физическэй култуура уонна успуорт миниистирин бастакы солбуйааччыта Гаврил Михайлович Мохначевскай салайаллар. Ити таһынан Ил Түмэн сис кэмитиэттэрин бэрэссэдээтэллэрэ Владимир Михайлович Прокопьев уонна Георгий Русланович Балакшин бааллар. Кинилэр 4 күн устата улуус бары нэһилиэктэригэр уонна Ньурба к. сылдьан улуус олохтоохторун тус боппуруостарынан приемнуохтара уонна ааспыт сыллааҕы үлэни отчуоттуохтара.
Сергей Местников Ньурбаҕа кэлэн иһэн, Чаппандаҕа «Бизнес-спринт» федеральнай бырайыагынан тутулла турар модульнай спорт саалатын көрдө. Бу эбийиэк СӨ норуоттарын IX Спортивнай оонньууларын көрсө тутуллар эбийиэктэриттэн биирдэстэрэ, сотору үлэҕэ киириэхтээх. Манна олохтоох уолаттар үлэлииллэр.
Бастакы күн киэһэ Күндээдэ нэһилиэгэр Саха Өрөспүүбүлүкэтин Бырабыыталыстыбатын сыллааҕы үлэтин отчуота саҕаланна. Отчуоттуур бөлөх салайааччыта — СӨ Бырабыыталыстыбатын Бэрэссэдээтэлин солбуйааччыта Сергей Васильевич Местников, Ньурба улууһуттан баһылык Алексей Михайлович Иннокентьев. Тус приемҥа 8 киһи, ол иһигэр Сергей Местниковка 3 киһи сырыттылар. СВО кыттыылааҕын дьиэтин өрөмүөнүн, норуот айымньытын дьиэтин өрөмүөнүн уонна олохтоох дьаһалта үлэһиттэрин хамнастарын үрдэтэр туһунан этиилэр киирдилэр.Отчуоттуур мунньахха 70 киһи сырытта.
Мунньах саҕаланыыта Сергей Местников «Күндээдэ» АО үлэһитэ Денис Антоновка «СӨ тыатын хаһаайыстыбатын туйгуна» бэлиэни үөрүүлээх быһыыга-майгыга туттарда. Отчуокка «Хаарбах дьиэттэн көһөрүү» тосхол, Тыа хаһаайыстыбатын министиэристибэтин граннарын, сир баайын хостуур тэрилтэлэри кытта өрөспүүбүлүкэ бүддьүөтүн толорууга ыытыллар үлэ, бэкээринэ аһарга грант ылыытын, уһайаан үлэһиттэрин хамнастарын үрдэтэр наадатын, Саха сиригэр миграннар үлэлии кэлиилэрин, үүт сыанатын, уотунан сылыттыыга тарыып туһунан уо.д.а. ыйытыктар киирэн хоруйданнылар.
Кэпсэтиигэ 3 киһи кытынна. Тыа хаһаайыстыбатыгар, өрүс хаайтарыылаах кэмигэр мууһунан муниципальнай туорааһыны оҥорууга, нэһилиэктэр бүддьүөт өттүнэн үптээх-харчылаах буолууларыгар сыһыаннаан, итиэннэ үөрэхтээһиҥҥэ олохтоох усулуобуйалары учуоттаан федеральнай нормативка эрэгийиэннээҕи нормативтар киириэхтээхтэрин туһунан бэйэлэрин туруорсууларын киллэрдилэр.
Түмүккэ Күндээдэ нэһилиэгин олохтоохторо СӨ ситэриилээх былааһын ааспыт сыллааҕы отчуотун биһирииллэрин биллэрдилэр.
Геннадий АНТОНОВ