Ийэ дойдуларын көмүскэһэ сылдьар хорсун уолаттарбытыгар өйөбүл күннэтэ күүһүрэн иһэр.
Бу күннэргэ Ньурба улууһун дэлэгээссийэтэ Анал байыаннай дьайыы зонатыгар тиийэн, биир дойдулаахтарбытын кытта көрсүһэ сылдьар.
Дэлэгээссийэ састаабыгар Ньурба куорат баһылыга Геннадий Игнатьев, Чуукаар нэһилиэгин баһылыга Артур Федоров уонна Күндээдэ нэһилиэгин баһылыга Анатолий Петров бааллар.
Кинилэр бэҕэһээ Запорожскай уобалас хайысхатынан, Мелитополь диэки үлэлээтилэр. Азовскай муора кытыытыгар баар Новая Ялта диэн сиргэ сырыттылар. Манна байыаннай госпитальга эмтэнэ сылдьар биир дойдулаахтарбытын кытта көрсүһүү буолла.
Госпитальга Мииринэйтэн төрүттээх медбрат уол үлэлии сылдьар эбит. Кини Саха сириттэн сылдьар уолаттары барыларын (Ньурба, Мииринэй, Амма, Нам, Кэбээйи улуустарыттан) ыҥыртаан, биир дойдулаахтарын кытта көрсөргө кыах биэрдэ. Ол иһигэр Антоновка уонна Күндээдэ уолаттара эмиэ бааллар.
Баһылыктар эмтэниини ааһа сылдьар байыастары кытта истиҥник кэпсэттилэр, дойдуларын сонуннарын тиэртилэр. Ол курдук, хас биирдии байыаска дойдуларыттан кэһиилэри туттардылар. Бу кэһиилэр – дойду сылааһын, чугас дьон тапталын, ыра санаатын, эрэлин тиэрдэр сыаналаах бэлэхтэр. Байыастар сүргэлэрэ көтөҕүлүннэ, санаалара күүһүрдэ. Кинилэр кэлэр кыайыыга өссө бөҕөх эрэллээх буоллулар.
Бу көрсүһүү биир дойдулаахтарбыт биир сомоҕо буолууларын, ыарахан кэмҥэ бэйэ-бэйэни өйөһүүтүн үтүө холобура буолар. Мииринэйтэн төрүттээх медбрат уолга кыһамньылаах, бэриниилээх үлэтин иһин махталбытын тиэрдэбит. Байыастарбытыгар этэҥҥэ үтүөрэллэригэр, барыта санаа хоту буоларыгар баҕарабыт!
Салгыы улууспут дэлэгээссийэтэ Бердянскай куорат таһыгар десантнай-штурмовой биригээдэ байыаһа Семен Я. (Ньурбачаан) көрсөн, эмиэ баһыылканы, гуманитарнай көмөнү туттардылар. Онтон Куликовскай полигоҥҥа тиийэн икки уолбутун көрсөн дойдуларын көмөтүн тиэртилэр. Салгыы айаннаан Мелитопольга тиийэн, Күндээдэттэн уонна Сүлэттэн төрүттээх уолаттары көрүстүлэр. Эмиэ тус баһыылкаларын уонна гуманитарнай көмөнү туттардылар.
Хорсун буойуттарбыт биир дойдулаахтарын көрөн, дойдуларын сонунун истэн уонна кэтэһиилээх-ахтылҕаннаах көмөнү, баһыылканы тутан улаханнык үөрдүлэр. Ол иһигэр бааллар дойдуларын ахтылҕаннаах аһылыгын эгэлгэтэ уонна уолаттарбыт сакаастарынан ылыллыбыт антидроннар, блиндаһы сылытарга «сухой фен», аккумуляторнай подстанциялар, саха быһаҕа уо.д.а.
Ньурба дьонугар истиҥ-иһирэх махталларын тиэрдэллэр. Хорсун саллааттарбытыгар кыайыы көтөллөөх этэҥҥэ дойдугутугар эргиллээриҥ диэн алгыс тылбытын тиэрдэбит!
Ньурба улууһун дьаһалтатын пресс-сулууспата.