Төһөннөн оҕону култуураҕа үөрэтэн, элбэх хайысханнан сайыннараҕын, оччонон эдэр сааһыгар төрөөбүт дойдута, Саха сирэ сайдарын туһугар үлэлиир буолар. Оҕо саастан саҕалаан, иллэҥ кэмҥэ дьарыктанарга, дьоҕургун сайыннарарга сылын аайы интэриэстэринэн араас куруһуок эбиллэр. Инньэ гынан бииртэн биир талаан аһыллан иһэр. Тэҥнээн көрдөххө, билиҥҥи ыччат отой атын, ол да буоллар ордук күүскэ дойдумсах санаалара баһыйар буолбут. Бу курдук Ньурба улууһун биир көхтөөх олохтооҕун, ыччатын кытта кэпсэттим. Кини кыра сааһыттан элбэх куруһуокка дьарыктаммыта, искусство оскуолатын выпускнига. Билигин устудьуон буолан, дойдутун аатын өрөспүүбүлүкэбит киинигэр ааттата, көмүскүү, көрдөрө сылдьар.
— Үтүө күнүнэн Кира, мин Никифоров Алексей, хос ааппынан Эркин диэн буолабын. Бэйэм маннааҕыбын, Ньурбабын. Ньурбатааҕы техническэй лицейи 2021 сыллаахха бүтэрбитим. Билигин Дьокуускайдааҕы мэдэсиинискэй кэллиэскэ «Лечебное дело» хайысхаҕа үөрэнэ сылдьабын. Тоҕо мэдэсиинэни талбытым буолуой? Ийэм Раиса Васильевна Никифорова Ньурба оройуоннааҕы киин балыыһаҕа сиэстэрэнэн үлэлиир. Кыра сылдьан уһуйааным үлэлээбэт кэмигэр ийэбин кытта үлэтигэр барсааччыбым. Уонна үлэһиттэр хайдах таҥна сылдьалларын, хайдах үлэлииллэрин көрөммүн дэлби интэриэһиргээччибим. Иккиһинэн, удьуордаан да буолуон сөп. Эппитим курдук, ийэм сиэстэрэ, эдьиийим Оксана Герасимовна куораттааҕы «Спид Центр»-га кылаабынай сиэстэрэнэн үлэлиир уо.д.а. Үсүһүнэн, мин дьону эмтиэхпин баҕарабын.
Дьиэ кэргэммитигэр оҕолор иккиэбит. Балтым Никифорова Айталина Ньурбатааҕы гимназияҕа 9 кылааһы кыһыл аттестатынан түмүктээн 10 кылааска таҕыста.
Араас тэрээһиннэргэ ыытааччы быһыытынан кыттабын, ыллыыбын, үнкүүлүүбүн, үөрэнэр группабар старостабын, кэллиэстээҕи студенческэй сэбиэккэ баарбын, Саха сиринээҕи орто үөрэх бэрэссэдээтэллэрин чилиэнэ уонна «Волонтеры-медики», «Волонтеры Победы», «Волонтеры культуры», «Экологические волонтеры», «Событийные волонтеры» хамсааһыннарга баарбын.
Бэйэм «Волонтеры-медики» хамсааһыҥҥа 2021 сылга киирбитим. Ол өттүнэн сиһилии кэпсиир буоллахпына, Саха сиригэр 2017 сылтан бу хамсааһын баар. Сүрүн хайысхаларбыт:
•«Санитарно-профилактическое просвещение», ол быһыытынан араас тиэмэлэргэ тэрилтэлэринэн сылдьан уонна дьоҥҥо-сэргэҕэ сырдатабыт, квиз уонна квест оонньуулары ыытабыт.
Иккис хайысха: «Первая помощь» аата даҕаны этэ сылдьарынан нэһилиэнньэни араас быһылааннарга хайдах буоларга, бастакы көмөҕө үөрэтэбит.
•«Популяризация кадрового донорства» хайысханан сотору-сотору буолбакка биир кэрдиис кэмҥэ улахан акция ыытабыт, донордары элбэтэ сатыыбыт.
•«Волонтерская помощь в медицинских организациях» хайысха. Волонтердар балыыһаҕа көмөлөһөллөр. Холобура, пандемия кэмигэр биһиги, волонтердар, үөрэхпит да кэмигэр, үөрэх кэнниттэн быраастарга кыахпыт баарынан, күүспүтүн ууран араас көмөнү оҥорбуппут. Ол курдук, Колл-центрга сайаапка ыларга, температура кээмэйдииргэ, лабораторияҕа, эмп илдьэн биэрэргэ уо.д.а. көмөлөспүппүт.
«Волонтеры-медики» хамсааһыҥҥа мэдэсиинэҕэ эрэ сыһыаннаахтар киириэхтэрин сөп диэн буолбатах, ким баҕарар манна кыттыһыан сөп. Онон ааҕааччылары эмиэ ыҥырыам этэ, биһиги кэккэбитигэр киириҥ диэн.
Билигин мин Ньурбаҕа үөрэхпин туйгуннук түмүктээн бараммын сайылыы кэлбитим. Дьиэбэр сыта сатаан баран тэһийбэккэбин Киин балыыһаҕа сайыҥҥы кэмҥэ мэдэсиинискэй быраатынан үлэлии киирбитим.
Үлэлээн бүтээт ойуурга тахсаммын сир астыыбын. Айылҕаҕа сылдьан киһи уоскуйар, сэниэ, күүс-уох ылар, сынньанар. Ону тэҥҥэ оҕуруоппун көрөбүн.
Саамай үчүгэй кэм — устудьуон бириэмэтэ — умнуллубат, өйгө хаалар кэмнэр. Онон саныырга үчүгэй буоларын курдук элбэх дьону кытта билсэн, ханнык эмит хамсааһыҥҥа кыттан, билэн-көрөн, күүлэйдээн, дьоҕургун, кыаххын сайыннарыахтааххын дии саныыбын. Ол буолар буоллаҕа, устудьуон кэмэ диэн. Биир сиргэ олорон, дьиэ-үөрэх-дьиэ буоллаҕына итинник олоро хаалан хаалыахтара.
Киһи салайар, бастыҥтан бастыҥ буолуон баҕалаах буоллаҕына устудьуоннар бэйэни салайыныыларыгар киирэрэ наада дии саныыбын.
Онно устудьуоннар талааннарын күүскэ арыйаллар, туохтан да кыбыстыбат буолаллар, лидерскэй хаачыстыбалара үрдүүр, ити курдук элбэх холобуру аҕалыахха сөп. Онон бириэмэлээх буоллаххытына үөрэххит студенчэскэй хамсааһыннарыгар киирэргитигэр ыҥырабын.
Саха сирэ сайдарын туһугар киллэрэр кылааккыт өссө үрдүү, үүнэ-сайда турдун!
Кира ПАХОМОВА