Сэтинньи 19 күнүгэр улуус баһылыга Алексей Иннокентьев салайааччылаах делегация Луганскайга байыаннай сулууспалаах Ньурбаттан төрүттээх биир дойдулаахтарбытын көрсө, билсэ, төрөөбүт дойдуларыттан ас, таҥас кэһиилээх көппүттэрэ. Кинини кытары Ньурба куорат баһылыга Геннадий Игнатьев, Түмүк нэһилиэгин баһылыга Дмитрий Егоров, Хорула баһылыга Тимофей Иванов сылдьыһаллар. Новоазовскайга Тирэх пууҥҥа үлэлиир улуус дьаһалтатын исписэлииһэ Игорь Попов көрсөн, хас даҕаны сиринэн сырыттылар. 
Бастатан туран, Москва уонна Ростов-На-Дону куораттарыгар госпитальга эмтэниини ааһа сытар Матвеев Н. уонна Габышев Б. көрүстүлэр, эмтиир быраастарын кытары кэпсэттилэр.
Ньурбаттан туонна аҥаара, барыта саха сириттэн холбоон 1,5 туонна таһаҕастаах тиийбиттэр. Барыта 70 набору 40Ньурба хо7уун уолаттарыгар тиксэрдилэр.
Күн-дьыл сырсыыта буолан, тиийбит күннэригэр тирэх пууҥҥа илдьэ кэлбит малларын сааһыланаат, тута Пологи куоракка уонна Федоровка сэлиэнньэтигэр сылдьан биир дойдулаахтарбытын кытары көрүстүлэр. Манна мобилизацияланан уонна контракт баттаһан кэлбит биир дойдулаахтарбыт бааллар.
Ньурбаттан ыыһаммыт сылгы этэ, быара, харта, ыһаарыламмыт собо, Бороһуок гына оҥоһуллубут собо миинэ, ”Көмүскэл” иис сыаҕа бэлэмнээбит набордарын туттартаатылар.
Маны тэҥэ байыаннай сулууспалаах уолаттарбыт баҕа санааларынан генератор, бензопила, тепловизордары, анал рациялары, онтон да атын маллары ылан илдьибиттэрэ.
Иккис күн Запорожье 4 хайысхатынан сылдьан 11 биир дойдулаахтарбытын кытары көрүстүлэр. Ол курдук, Зеленопольеҕа, Сладководнайга, сорохторун лесополосаҕа. Араас хайысханан бытанан сытар буоланнар элбэх сири кэрийбиттэр.
Салгыы Новоазовск тирэх пуунуттан Луганскай тирэх пуунугар бараллар. Аара Волновахаҕа сылдьан байыаннай сулууспалаахтары кытары көрсөллөр.
Төрдүс күннэригэр Северодонецк, Рубежное хайысханан Варваровка диэн сиргэ сырыттылар. Манна биир дойдулаахтарбыт 1 батальон уолаттара бааллар.
Маны тэҥэ саха сириттэн контрагынан кэлэ сылдьар фельдшер кыргыттары көрүстүлэр. Блиндажка олороллор, сылытталларыгар диэн керона, рация уонна саха сириттэн илдьэ кэлбит астарыттан күндүлээн, анал хомуллубут аптечкалары биэрэн, медик кыргыттар биһиги биир дойдулаахтарбытыгар улахан махталларын тиэрдэллэр. Манна Чурапчыттан, Эдьигээнтэн, Кэбээйиттэн уонна Бүлүүттэн кэлбиттэр.
Көрсүһүүлэргэ Ньурбаттан төрүттээх эрээри атын улуустартан, Дьокуускайтан барбыт уолаттар, күтүөттэр бэйэлэрэ истиһэн кэлэн көрсөллөр, кэпсэтэллэр. Кими даҕаны ордорбокко барыларыгар тоҥ быар, эт, балык биэрэн үөрүүлэрэ үгүс, биллэ сэргэхсийэллэр диэн кэпсээтилэр. Биир дойдулаахтарбытыгар өйөбүллэрин, көмөлөрүн иһин улахан махталларын тиэрдэллэр.
Дьиэлэриттэн тэйиччи сылдьар дьоҥҥо дойдуларын дьонуттан болҕомто, сылаас сыһыан, үтүө тыл үс бүк минньийэн киирэр. Бу түгэҥҥэ улуус баһылыга бэйэтинэн тиийэн уолаттары көрсөн, туруктарын билсэн, миэстэтигэр барытын көрөрө-истэрэ улахан суолталаах. Алексей Иннокентьев СВО саҕаланыаҕыттан бу төрдүс сырыыта буолар. Уолаттар дьонноругар үөрэн долгуйан, төлөпүөн нөҥүө биир дойдулаахтара анаан кэлэн көрсөн барбыттарын кэпсииллэрэ дьонноругар олус күндү буоллаҕа. Дойду сонуна, ахтылҕаннаах аһа хорсун буойуттарбыт санааларын өрө көтөхтүн.
Лена ПЕТРОВА