Бүгүн, муус устар 5 күнүгэр, Ньурба улууһугар Бүлүү эбэ бассейныгар бастакы алмаас көстүбүтэ 75 сылын туолар үбүлүөйдээх тэрээһиннэрэ ыытыллаллар. 1949 с. Г.Х.Файнштейн салайааччылаах этэрээт алмаас трубкатын булбута.
Ити кэннэ 1953 с. Амакинскай экспедиция Иркутскайтан саха сиригэр, ол эбэтэр Ньурбаҕа көһөн кэлэр. Дьэ, ити кэмтэн ылата биһиги Ньурбабыт улууһа алмаастаах ааты ылан сайдыы суолугар үктэммитэ 75 сыла буолла.
Бүгүн Геологтар уонна Амакинскай экспедиция Сквердэригэр урут үлэлии сылдьыбыт бэтэрээннэр, билигин АЛРОСА АХ тэрилтэ үлэһиттэрэ үөрүүлээх тэрээһиҥҥэ муһуннулар.
Геолог, Вера Свиридова Геологтар Сквердэригэр мустубут дьоҥҥо историяттан быһа тардан кэпсээтэ:
— Амакинскай экспедиция кэнники сылларга умнулла быһыытыйан эрэрин көрөн, салалтаҕа өйдөбүнньүк сквер оҥоруохха диэн этиилээх тахсыбыппыт. Маны тэҥэ аатырбыт геолог Куллунтарий Ноговицын аатынан, Амакинскай уулуссалар баар буолуохтаахтар диэн туруорсубуппут. Билигин бу Сквер ити уулуссалар быһа охсуһууларыгар турар.
Улахан өҥөнү ол саҕана Айхалга базаламмыт Амакинскай экспедиция оҥорбута. Сүрүн инженер Сергей Алексеевич Платонов салалтатынан барытын бэйэлэрин базаларыгар оҥорбуттара, бу улахан таастары, ыстаалтан эһэни бэйэтин эскиһинэн оҥотторбута уонна Ньурбаҕа тиэйэн аҕалбыттара. Улуус, куорат салалтата тэҥҥэ үлэлэспитигэр махталбыт улахан.
Салгыы Амакинскай экспедиция скверигэр гирлянда, сибэкки дьөрбөтө уурдулар. Тэрээһин улуус дьаһалтатын аактабай саалатыгар салгыы ыытыллыа.
Лена Петрова