Герой Чусовской аатын сүгэр Антоновка орто оскуолата улуус, республика аграрнай оскуолаларыттан биирдэстэрэ, директор Данил Александрович Федоров. Агрооскуола сүрүн хайысхата – оҕуруот аһа: хортуоска, хаппыыста, оҕурсуу, помидор, перец, моркуоп, сөбүөкүлэ, о.д.а. Лааҕырга да утары сииллэр, кыһын остолобуойга да абыраналлар. Онно эбии күһүн чэй хатараллар, төрдүс сылларын Куочайга тигээйи иитэн мүөт атыылыыллар уонна быйыл теплицаҕа икки сүүстэн тахса ук клубника олортулар.
Оскуолаҕа кэлбиппитигэр производстваҕа директоры солбуйааччы Николай Александрович Николаев, маастардар Василий Васильевич Куприянов, Александра Алексеевна Софронова дьааһык иһигэр баар тигээйилэр оҥорбут мүөттэрин буосканан сабылла сылдьарын арыйан атыыга таһаараары бэлэмнии сылдьаллара, барытын көрдөрөн, кэпсээн биэрдилэр.
Оннук аҕыс дьааһык баар (пчелосемья), иһигэр алталыы рамалаах. Аны мүөт сорох сиринэн хараҥа, сорох сиринэн сырдык. Ити тигээйи ханнык сибэккигэ сылдьыбытыттан. Быйыл уулаах, сибэккитэ элбэх диэн Бакамдаҕа көһөрбүттэр эбит, эрдэ пасека Букчайга турааччы. Быһа холоон көрүүлэринэн бу сылга мүөт өссө тупсубут, элбээбит. Холобур, былырыын 50 киилэни ылбыттар. Биир тигээйи биир сайын биир чайнай ньуоска мүөт биэрэр. Оччоҕо хас тигээйи баар, ааҕан көрүҥ…
Итинник ыраастаан, «арыйан» баран илиилэринэн медогонка диэн аппаракка эрийэллэр, мүөтүн түһэрэллэр. Ол кэннэ кыраанынан сиидэлээн атын иһиккэ сүүрдэллэр, онтон тараларга кутаттыыллар. Нэһилиэнньэ олох үчүгэйдик ылар, атыыга тахса да илигиттэн сакаас толору дииллэр. Маннык дьарыгынан оҕолор научнай үлэ суруйаллар, оскуола араас ярмаркаларга көрдөрөр, маҕаһыыҥҥа батарар. Киирбит харчылара ороскуоттарын сабар, оскуола наадаларыгар туттуллар. Былырыыҥҥы тигээйилэрин кыстатан көрбүттэрэ табыллыбат эбит. Сайын устата улахан көрүү наадата суох, кэмиттэн кэмигэр анал таҥас кэтэн көрөн кэлэллэр, кымырдаҕас, үрүмэччи киирбитин хонтуруоллууллар.
Мүөтү бэлэмниир улэҕэ бэйэтэ санаатыттан ахсыс кылаас үөрэнээччитэ Целистина Давыдова сырытта, улахан интэриэстээх.
Оскуола аграрнай хайысхатыгар өссө бааллар маастар Саргылаана Семеновна Фокина, сайынын үлэлээбит биология учуутала Любовь Анатольевна Петрова.
Онон Антоновка оскуолата киэҥник биллэр Куочайы атын өттүттэн ааттатан сылдьаллар. «Кочайский мед», «БукЧай» номнуо бренд буолан тураллар, дьон-сэргэ биһирэбилин ылаллар.
Октябрьскай нэһилиэк дьаһалтатын пресс-сулууспата.