Ньурбаҕа «Кыайыы уота» кэлиэҕэ

Аан дойдуну атыйахтаах уу курдук аймаабыт Иккис аан дойду сэриитэ түмүктэммит күнүн көрсө, атырдьах ыйын 28 күнүгэр Дьокуускай куорат Кыайыы болуоссатын мэҥэ уотуттан Ньурбаҕа «Кыайыы уота» айаҥҥа турунна. Улуу Кыайыы 80 сылыгар аналлаах бу аахсыйаны көҕүлээччилэринэн Ньурба улууһун ыччаттара буолаллар.
Үөрүүлээх тэрээһиҥҥэ улуус Сүбэтин бэрэссэдээтэлэ Нюргуяна Михайлова, СӨ дьахталларын уопсастыбаннай тэрилтэтин бэрэссэдээтэлэ Анжелика Андреева, «Биир ньыгыл Арассыыйа» баартыйа Саха сиринээҕи салаатын уопсастыбаннай ыстаабын салайааччыта Саргылана Неустроева, СВО кыттыылааҕа Максим Иванов, улуустааҕы ыччат дьыалатын уонна имидж бэлиитикэтин управлениетын салайааччыта Валерия Владимирова, Дьокуускайга олорор биир дойдулаахтарбыт уопсастыбаннай түмсүүлэрин салайааччыта, «Айар уустар» креативнай индустрия колледжын дириэктэрэ Елена Яковлева уонна биир дойдулаахтарбыт кытыннылар.
Елена Григорьевна Яковлева улуус ыччатын лиидэригэр Валерия Гаврильевнаҕа «Кыайыы уотун» ылан туттарда. Кыайыы уота Ньурбаҕа кэлэн, Сэбиэскэй Сойуус Геройа майор Н.Н.Чусовской төрөөбүт нэһилиэгиттэн — Антоновкаттан балаҕан ыйын 3 күнүттэн саҕалаан, Улуу Кыайыы күнүгэр диэри улууспут бары нэһилиэктэрин кэрийиэҕэ. Улуу Кыайыыны уоттаах сэрии толоонугар уонна тыылга уһансыбыт аҕа көлүөнэ геройдуу хорсун быһыытын үйэтитэр тэрээһиннэр, аһымал аахсыйалар, тимуровскай үлэлэр, аҕа көлүөнэ дьон килбиэннэх олоҕун холобурдарыгар оҕону-ыччаты патриотическай тыыҥҥа иитэр хабааннаах үгүс үлэ ыытыллыаҕа.

Геннадий Антонов