Бүгүҥҥүттэн Ньурбаҕа өссө биир оҕо оонньуур, сынньанар киинэ үлэтин саҕалаата. Бу киэҥ-куоҥ, хас даҕаны аттракционнаах киини 3 оҕолоох ийэ Мария Николаева арыйбыт.
— Ньурбабытыгар орто, улахан кылаас оҕолоро оонньоон бириэмэ атаарар сирдэрэ суоҕунан, кыра саастаах оҕолор оонньуур сирдэрэ аҕыйаҕынан сибээстээн маннык киини арыйбыт киһи диэн санаа өссө 2023 сыллаахха киирбитэ. Онтон дьэ ситэн-хотон, былырыын сэтинньи ыйтан быһаарынан ахсынньыга бэлиэр батуттары сакаастаан саҕалаабытым.
Саамай үлэтэ диэн батут хомуйааһына этэ, бырааттарым Андрей, Саша, Максим икки күн иһигэр хомуйан бүтэрбиттэрэ. Биир үчүгэйэ диэн шариктардаах улахан батукка улахан даҕаны киһи киириэн сөп, холобура, төрөппүт оҕотун кытары.
Маны таһынан төрөөбүт күннэри, бырааһынньыктары тэрийэргэ барыта баар, миэстэтигэр сымнаҕас мороженай кытары атыылыыбыт, — диэн Мария Николаева кэпсээтэ.
Киэҥ толкуйдаах урбаанньыттар бу курдук дьон сынньанарыгар анал сирдэри арыйан куораппыт тупсарыгар тус кылааттарын киллэрэллэр.
Лена Петрова