👩👩👧👦Бүгүн, тохсунньу 19 күнүгэр Ньурбатааҕы ГТАС дьиэтигэр «Саха сирин кыһыл көмүс дьиэ кэргэттэрэ» көмүс кинигэҕэ киирбит Степан Никитич уонна Варвара Давыдовна Тихоновтар, Сергей Семенович уонна Евдокия Максимовна Ивановтар аҕам саастаах дьиэ кэргэннэри чиэстээһин буолла.
Ааспыт сылга СӨ Үлэ сыла биллэриллибит сылыгар СӨ Бырабыыталыстабытын иһинэн уонна ГТАС управлениетын бырайыагынан, СӨ үлэ уонна социальнай сайдыы министиэристибэтэ көҕүлээһининэн «Саха сирин кыһыл көмүс дьиэ кэргэттэрэ» кинигэтэ тахсыбыта. Кыһыл көмүс дьиэ кэргэттэргэ аналлаах кинигэ 2008 сылтан бэчээттэнэн тахсар, ааспыт сылга алтыс кинигэ күн сирин көрбүт.
📕📖 Киэҥ нэлэмэн Саха сириттэн албан ааттаах дьиэ кэргэннэр ортолоругар Ньурба оройуонуттан: Сергей Семенович, Евдокия Максимовна Ивановтар, Виктор Михайлович, Октябрина Прокопьевна Кузьминнар, Николай Степанович, Пелагея Николаевна Седалищевтар, Иннокентий Николаевич, Татьяна Никитична Тимофеевтар, Степан Никитич уонна Варвара Давыдовна Тихоновтар, Владимир Степанович , Анна Николаевна Хахыровтар дьиэ кэргэннэрэ кинигэҕэ киирбиттэр.
👩👩👦👦 Быйыл Арассыыйаҕа Дьиэ кэргэн сыла биллэриллэн, кинигэҕэ киирбит аҕам саастаахтары, биэс уон сыл ордугуна бииргэ олорбут, холобур буолар дьиэ кэргэннэри: СӨ тыа хаһаайыстыбатын туйгуна, Учууталлар учууталлара, Ньурба уонна Дьаархан нэһилиэгин Бочуоттаах гражданина Степан Никитич, Ньурба оройуонун, Ньурбачаан уонна Үөдэй нэһилиэктэрин Бочуоттаах гражданина, киинэ бэтэрээнэ, култуура туйгуна, «Гражданскай килбиэн» бэлиэ хаһаайына Варвара Давыдовна Тихоновтар, Маалыкай I-кы Бордоҥ нэһилиэгиттэн төрүттээх, Ньурба улууһун, Бордоҥ нэһилиэгин бочуоттаах олохтооҕо, Арассыыйа үлэтин бэтэрээнэ, СӨ тыа хаһаайыстыбатын бочуоттаах бэтэрээнэ Сергей Семенович, Саха сирин тыатын хаһаайыстыбатын, Ньурба оройуонун ветеринарнай сулууспатын бэтэрээнэ, Ньурба оройуонун тыатын хаһаайыстыбатын Бочуоттаах үлэһитэ Евдокия Максимовна Ивановтар дьиэ кэргэннэрэ чиэстэннилэр.
Улуустааҕы ГТАС салайаччыта Альбина Алексеева «Саха сирин кыһыл көмүс дьиэ кэргэттэрэ» кинигэҕэ киирбит дьоруойдары Арассыыйа Дьиэ кэргэн сыла биллэриллибитинэн эҕэрдэлээн туран, аҕам саастаах дьиэ кэргэннэригэр чэгиэн доруобуйаны, нус-хас олоҕу баҕарда.
Дьиэ кэргэннэри чиэстээһиҥҥэ улуустааҕы дьиэ кэргэн бэлиитикэтин социальнай отделын сүрүннүүр исписэлииһэ Анжелика Никифорова, «Октябрьскай нэһилиэк» МТ баһылыга Семен Корякин, «Ньурбачаан нэһилиэгэ» МТ баһылыга Мария Семенова, кинигэ дьоруойдарын оҕолоро эҕэрдэ тыл эттилэр, сибэкки дьөрбөтүн үөрүүлээх быһыыга-майгыга туттардылар, Октябрьскай нэһилиэктэн эҕэрдэ ырыалары бэлэх ууннулар. 💐💐💐👏👏👏
Кинигэ дьоруойа Сергей Семенович Иванов бар дьонугар махтанан туран түмүк тыл эттэ: «Саха сирин кыһыл көмүс дьиэ кэргэттэрэ» кинигэҕэ киирии , бары өттүнэн үтүө холобур буолуу ирдэбиллээх уонна улахан чиэс дии саныыбын. Улуустааҕы ГТАС, Октябрьскай нэһилиэгим дьаһалтатыгар дьиэ кэргэн аатыттан улахан махталбын тиэрдэбин.Бар дьонум дьоллоох, соргулаах буолуҥ!»
Тихоновтар дьиэ кэргэннэрин аатыттан ыал ийэтэ Варвара Давыдовна Тихонова: «Биэс оҕону төрөтөн, барыларын үөрэхтэтэлээн, үлэһит оҥортоон төрөөбүт дойдуларыгар, өрөспүүбүлүкэҕэ тиийэ салайар үлэҕэ үлэлииллэр.Инникитин оҕололрбут, сиэннэрбит биһиги холобурбутун батыһан этэҥҥэ олоруохтара, үлэлиэхтэрэ диэн эрэнэбин. 62 сыл тухары этэҥҥэ олорон кэллибит, билигин өссө да олордорбут диэн баҕа санаалаахпыт.
Кинигэҕэ киирии улахан бочуот, чиэс буолар. Биһиги дьиэ кэргэн кыһыл көмүс кинигэҕэ киирбиппитинэн киэн туттабыт. Түгэнинэн туһанан нэһилиэкпит баһылыгар Мария Николаевнаҕа, ГТАС салайааччытыгар Альбина Ивановнаҕа махталбытын тиэрдэбит.
Киһиэхэ кылаабынайа доруобуйа баар буоллаҕына үлэ баар буолуо, үлэ баар буоллаҕына, олох сайдыа . Эйэлээх, эйэ дэмнээх олох өрүүтүн баар буоларыгар баҕарабын.
Түмүккэ дьиэ кэргэнинэн өйдөбүнньүк хаартыскаҕа түһүүнэн тэрээһин түмүктэннэ.
Сиһилии «Ньурба» хаһыат кэлэр нүөмэригэр ааҕыҥ.
Антонина Семенова