Соторутааҕыта Дьиикимдэ нэһилиэгэр «Семен Дежнев» киинэҕэ уһуллубут СӨ үтүөлээх артыыһа Маргарита Михайловна Борисоваҕа анаан «Абакаяда» уобараһыттан архитектурнай дьүһүйүү үөрүүлээх арыллыыта буолбута. Эдэр ааптар Василий Александрович Чарпыков архитектурнай дьүһүйүү уонна былаан туһунан санаатын үллэһиннэ.
Василий Александрович Дьиикимдэттэн төрүттээх. «Биир дойдулааххар архитектурнай дьүһүйүүнү оҥоруу хайдах эбитий?»-диэн ыйытыыбар бу курдук эппиэттээтэ.
-Дьиҥэр аҕам өттүнэн төрдүм Чаппанда, ол эрэн Дьиикимдэҕэ олорбут, улааппыт дойдум буолар. Улааппыт дойдубар, биир дойдулаахтарбар үйэлээх оҥоһугу хаалларар олус үчүгэй, үөрүүлээх буоллаҕа дии.
Бастаан туохтан саҕаламмытын ахтан ааста: — Ааспыт кыһын Дьиикимдэ нэһилиэгин баһылыга Прокопий Николаевич Осипов тыа сиригэр сайдыы хайысхаларынан үлэлэһэргэ концепциятын билиһиннэрбитэ. Дьиикимдэ нэһилиэгин кулуубугар Маргарита Михайловна аатын иҥэрэргэ этиилээх кэлбитэ. Ол онно олорон Абакаяда уобараһа харахпар көстөн кэлбитэ, тутатына лиискэ уруһуйдаан көрбүтүм, уруһуйбун мустубут дьон сэҥээрбиттэрэ.
Биһиги саҥардыы маннык үлэни ылсан эрэр буоламмыт, Маргарита Михайловнаҕа үүт-үкчү майгыннатыам суоҕа диэн толло саныыр этим. Ол иһин Абакаяда уобараһынан дьүһүйүү диэн уопсай сөбүлэҥҥэ тиийбиппит. Мин бу үлэни ылсарбар ыйан-кэрдэн, сүбэлээн биэрбит, «Оҥоруохтаххын!» диэбит киһинэн Култуура департаменын салайааччыта Розалия Михайловна Тихонова буолар.
-Бу иннинэ Эллэй, Луиза Кулачиковтар Чаппандаҕа Омолдооҥҥо аналлаах пааматынньык туруорбуттара. Быйыл бу пааматынньык силигин ситэн композиция буолан турда. Манна кыттыыны ылан көрөн-истэн үөрэннэххит дии.
-Былырыын күһүн Кулачиковтар Чаппандаҕа кэлэллэрин истэн, бииргэ үлэлиир уолбунаан Иванов Айсенныын үлэбитинэн үөрэнэ тахсыбыппыт. Кулачиковтар биһиэхэ билиилэрин, уопуттарын үллэстибиттэрэ. Быйылгы үлэлэригэр биһиги сылдьыспатыбыт да буоллар, ыкса сибээстэһэбит.
-Василий Александрович, инники былааннарыҥ туһунан билиһиннэр этэ.
-Этэҥҥэ элбэҕи билэн, үөрэнэн, дьүһүйэн, айан-тутан Ньурбабыт тупсаҕай көрүҥнээх буоларыгар, урукку устуоруйаны бар дьоҥҥо көрдөрөн үлэлэһэргэ баҕа санаалаахпын.
-Махтал.
Антонина Семенова