Алтынньы 16 күнүгэр нуучча тылын уонна литературатын нэдиэлэтин чэрчитинэн биһиги Ньурбатааҕы техническэй лиссиэйбит истиэнэлэрэ баал былааччыйатын тыаһынан уонна күлүүннэн-үөрүүннэн туолбуттара.
Александр Сергеевич Грибоедов 230 сааһыгар аналлаах «Грибоедовский бал» буолбута. Баалы 8 «б» кылаас үөрэнээччилэрэ полонез үҥкүүннэн арыйбыттара. Ол кэннэ атын кылаастар мазурка, котильон, падеграс, па де труа үҥкүүлэри туруорбуттара. Баалы выпускниктар вальсынан түмүктээбиттэрэ.
Баалбыт үҥкүүннэн эрэ муҥурдамматаҕа. Программаҕа араас светскай уопсастыба болҕомтотун уурар оонньуулар, тэрээһиннэр баар этилэр. Үөрэнээччилэр араас викториналарга кыттан, сытыы өйдөрүн тургуппуттара.
10 «а» уонна 10 «б» кылаастар хас биирдии ыалдьыт ол кэминээҕи баал тыыныгар уйдарарыгар кыһаллан тэрийбиттэр.
Үөрэнээччилэр баал туһунан бэйэлэрин санааларын маннык үллэһиннилэр.
Саввинова Юля, 11 «а» кылаас үөрэнээччитэ:
— Баал тыына, ааттааҕын курдук, уус-уран тылга, кэрэҕэ, билиигэ олоҕурар. Ол үйэтээҕи дьон таҥаһын кэтэн, сырдык, киэҥ саалаҕа классическай муусука тыаһыгар вальс үҥкүүлээн уйдарбыппыт. Хас биирдиибит тутта-хапта сылдьыыта, мичээрэ, туспа эйгэни үөскэппитэ.
Бу баал биһиэхэ умнуллубат түгэн буолбута, сырдыкка-кэрэҕэ кынаттаабыта. Ураты кэрэ уонна умсугутуулаах түгэн буолан ааста дии саныыбын.
Винокурова Малена, 11 «а» кылаас үөрэнээччитэ:
«Литературнай баал олус умсугутуулаах, кэрэ түгэн буолбута! Бары олус кэрэтик таҥнан, ол үйэҕэ тиийбит курдук санаммыппыт.
Маннык тэрээһиннэргэ оҕолор ордук бэйэ-бэйэлэрин кытта түмсэн, кыһаллан үҥкүү, постановка туруоран кыттыыны ылаллар. Дьону түмэр, киһи духуобунай өрүтүн сайыннарар-кэҥэтэр дьиҥнээх бырааһынньык»
Бу баал олус кэрэ, киэҥ хабааннаах тэрээһин буолар. Дьон олус нарыннык кэпсэтэллэр, үҥкүүлэринэн харахтарынан бэйэ-бэйэлэрин өйдөһөллөр. Култуура уонна этикет сиэрэ-майгыта дьикти эйгэни үөскэтэр.
Оля Фелегонова, Ньурбатааҕы техническэй лиссиэй 11 «а» кылааһын үөрэнээччитэ