Оҕо, сиэн баайдаах саха ыалын кэскилэ сырдык

Биһиги дойдубутугар 2008 сылтан от ыйын 8 күнүгэр Дьиэ кэргэн, таптал уонна бэриниилээх буолуу күнэ  бэлиэтэнэр. Дьиэ кэргэн — таптал хатыламмат эйгэтин, өйдөһүүнү уонна үтүө санааны түстүүр бу саамай чугас дьоммут.

Историяҕа киирэн ыллахха, бу биир ураты сырдык уонна былыргы бырааһынньык кэргэннии Петр уонна Февронья чиэһигэр бэлиэтэнэр.

Оҕо сааспыт остуоруйаларыгар ааҕааччыны долгутар этии мэлдьи баар буолара: «Кинилэр уһуннук, олус дьоллоохтук олорбуттара уонна биир күн өлбүттэрэ, «- диэн.Бу оҕолорбут алын кылаастарга үөрэтэр сэһэннэрин кытта быһаччы сибээстээх. Суругунан пааматынньык буолбут нуучча норуотун бу былыргы литературнай айымньыта XVI үйэҕэ суруллубута.Айымньы ис хоһооно олоххо буолбут муромскай кэпсээннэргэ, үһүйээннэргэ олоҕуран кэпсэнэр. Сэһэн геройдара буолбут Петр уонна Февронья Муромскайдар кэргэннии олохторугар дьиэ кэргэҥҥэ  бэриниилээх буолуу, таптал сыаннастарын олохторугар көрдөрбүт  сибэтиэй кэргэнниилэр этилэр.Кинилэр улахан тапталлара хас эмэ үйэни нөҥүөлээн, суолтата сүппэккэ күн бүгүҥҥэ диэри тийэн кэллэҕэ уонна бу сырдык куттаах бырааһынньык Петр уонна Февронья күнэ — Дьиэ кэргэн, таптал уонна бэриниилээх буолуу бырааһынньыга буолан бэлиэтэнэр.

Бу бэлиэ күнү  Муром куоратын (Владимирскай уобалас) олохтоохторо көҕүлээбиттэрэ. Дьиэ кэргэн бырааһынньыга «Таптал уонна бэриниилээх буолуу» диэн мэтээллээх уонна ромашка сибэкки бэлиэлээх.

Хаҥалас нэһилиэгэр 50 сыл бииргэ олорбут  Анна Афанасьевна, Николай Федотович Осиповтар, Ираида Марковна, Василий Николаевич Додоховтар, Дарья Никитична, Василий Гаврильевич Григорьевтар, Мария Прокопьевна, Василий Григорьевич Самсоновтар, Марфа Калиновна, Николай Алексеевич Григорьевтар, Варвара Прокопьевна, Николай Данилович Васильевтар дьиэ кэргэттэрэ бааллар.Кинилэр олорбут олохторо, үлэлээбит үлэлэрэ, оҕоҕо күүстээх тапталлара өлбөөдүйбэт, көлүөнэттэн  көлүөнэҕэ бэриллэ туруо.

«Золотые семьи Якутии” кинигэҕэ биһиги нэһилиэктэн Ираида Марковна, Василий Николаевич Додоховтар дьиэ кэргэттэрэ киирбиттэрэ. Билигин биһиги нэһилиэкпитигэр элбэх оҕолоох 24 ыал олорор.

Олор истэригэр «Ийэ Албан Аат ll степенэ бэлиэлээх, 8 оҕолоох Мачаттырова Людмила Олеговна, сэттэ оҕолоох Антонина, Прокопий Адамовтар, алта оҕолоох Улита, Николай Курышевтар, алта уоллаах Анжелика, Михаил Васильевтар. Нэһилиэкпитигэр олорор, үлэ хамнас ортотугар сылдьар эдэр ыаллар бу уустук кэмҥэ хас биирдиилэрэ оҕолорун туһугар олус кыһаллан, үлэҕэ хамнаска, спорка, үҥкүүгэ сыһыаран иитэ сылдьалларын киһи астына, үөрэ көрөр.

Сыллата судаарыстыбаттан көрүллэр дьиэ кэргэни өйүүр төлөбүрдэр  эбиллэн иһэллэрэ тустаах ыалларга улахан көмө буолар.

Тымныы  кыһыннаах, куйаас сайыннаах, үтүө мааны дойдубутугар, бигэ-таҕа олохтоох Дьиэ кэргэн үксээн истин! Оҕо, сиэн баайдаах саха ыала кэскилэ сырдык, үөрүүтэ үгүс буолуохтун!
Дьиҥ саханы үксэтэр,
Дьоһун ыччаты иитэр,
Дьылҕа ыраах ыйыытынан
Дьикти олох төрдө буолуҥ! (Эдьиий Дора алгыһыттан).

Мария Николаева