Өрөспүүбүлүкэ оскуолаларга «ШкИБ»-кэ (школьное инициативное бюджетирование) бырайыактары сүүмэрдиир күрэҕи биллэрбитэ.
Сүүмэрдиир күрэх сыала — оскуола инфраструктуратын сайыннарыыга көдьүүстээх үп быһаарыытын ылыныыга оҕолору, учууталлары, төрөппүттэри кытыннарыы. Бу программа чэрчитинэн П. С. Егоров аатынан Акана орто оскуолатыгар оскуола уопсай мунньаҕа буолан ааста.
Оскуолабыт бигэ туруктаах, саҥа ирдэбиллэргэ эппиэттиир, интэриэһинэй тэрээһиннэри тэрийэргэ икки олус интэриэһинэй бырайыагы истээччилэр дьүүллэригэр таһаарда.
Ол курдук, 8 кылаас үөрэнээччитэ Солтуева Маша — «Школьный кинотеатр»; 10 кылаас үөрэнээччитэ Жиркова Вера — «Родное село-чистое завтра». Оҕолор бырайыактарын презентация оҥорон кэпсээтилэр, былааннарын олоххо киллэрэргэ суот-учуот оҥорон, төһө үп-харчы наада буоларын суоттаан кэлбиттэр.
Маннык бырайыак оҕолору сөптөөх быһаарыыны ылынар, ааҕар-суоттуур дьоҕурдарын сайыннарар, толкуйдатар, элбэххэ үөрэтэр аналлаах.
Куоластааһын түмүгүнэн «Школьный кинотеатр» бырайыак кыайыылааҕынан таҕыста. Бу бырайыак салгыы өрөспүүбүлүкэ үбүлүүр бырайыактарын сүүмэрдиир күрэҕэр кыттыыны ылыаҕа.
Оҕолорго ситиһиилэри!
Соркомова А. П., тэрийээччи-педагог