Биһиги биир дойдулаахпыт, аҕыйах хонуктааҕыта Тюмеҥҥа Арассыыйа Кубогын призера буолбут Полина Иудина «Дзюдо Арассыыйатааҕы туурун» кыайыылааҕа буолла. Кини Екатеринбург куоракка дзюдоҕа Дьахтар лигатын III түһүмэҕэр 78 кг ыйааһыҥҥа дьиҥ-чахчы спортивнай характерын көрдөрөн, күүскэ эриһэн туран бастаата.
Бу күрэхтэһиигэ кини бэйэтин бөлөҕөр Челябинскай уобалас күүстээх спортсменката Виктория Лихачева кэнниттэн 2-с көрдөрүүлээх тахсыбыта. Полуфиналга Полина Иудина эдэр эрээри, олус күүстээх уонна кэскиллээх Кристина Коновалованы (Рязань уобалаһа) баһыйда. Виктория Лихачева Кристина Коноваловаҕа кыайтаран кэбистэ, инньэ гынан күрэхтэһии эргиир (круговой) систиэмэтинэн ыытыллар буолан, Полина Иудина көбүөргэ утарсааччытын кытта иккистээн көрүстэ. Дьэ, манна биһиги кыыспыт кыайыыга дьулуурун көрдөрөн, 2 мүнүүтэ иһигэр кылбар кыайыыны ситистэ.
Бу туһунан Полина Иудина бастакы тренерэ, СӨ үтүөлээх тренерэ Эдуард Соловьев иһитиннэрдэ. «Полина бу сылы кыһыл көмүс мэтээлинэн түмүктээн улаханык үөрэн, көтүөн кыната эрэ суох, — диир Эдуард Исаевич. – Москваҕа ахсынньы 21-22 к. РФ дзюдо Федерациятын финалыгар короннай техникатын бөҕөргөтүөх буолла. Кини бэйэтин бөлөҕөр киирсии бүтэрэ аҕыйах сөкүүндэ хаалбытыгар кыһыылаахтык хотторбута. Хата, бэйэтин күүскэ хомунан, салгыы отой үчүгэйдик кииристэ.
Бу күрэхтэһиигэ Саха сириттэн хас даҕаны спортсменка кытынна. Арассыыйа чөмпүйүөнэ Аина Моисеева биирдэ, Арассыыйа биирдиилээн бастыыр иһин күрэхтэһиитин призера Саина Петрова 2-тэ кииристилэр. Арассыыйа чөмпүйүөнэ, РФ Кубогын кыайыылааҕа Карина Ефимова эмиэ кытынна.
Ньурбаттан дзюдо курдук ыарахан спорт көрүҥэр Арассыыйа таһымыгар тахсан күрэхтэҺэ сылдьар иитиллээччибин хайгыыбын уонна РФ дзюдо Федерациятын финалыгар ситиһиилээхтик кыттарыгар баҕарабын».
Геннадий Антонов