Кулун тутар 15-17 кк. дойду үрдүнэн сүҥкэн суолталаах бэлитиичэскэй түгэн — Арассыыйа Бэрэсидьиэнин быыбара ыытыллар. Бүгүн сарсыарда 8 ч. Ньурба оройуонун бары 31 быыбардыыр учаастага, ол иһигэр Накыын вахтовай бөһүөлэгэр быстах кэмнээх 1 быыбар учаастага аһылыннылар.
Улуус үрдүнэн барыта 17004 киһи быыбардааччылар испииһэктэригэр киирэн сылдьар. Ньурбатааҕы тыйаатыр дьиэтигэр олохсуйан үлэлиир 403 №-дээх учаастактааҕы территориальнай быыбардыыр учаастакка 8 ч. буолан эрдэҕинэ тиийэн, Ньурба 1 №-дээх орто оскуолатыгар бииргэ үөрэммит кылааһынньыкпын, 2 №-дээх орто оскуолатын технологияҕа учуутала Марина Иванованы кытта инники буоллубут.
Биһиги кэннибиттэн өссө 2 киһи кэллэ. Лоп курдук 8 чааска учаастакпыт аһыллан иһирдьэ кутуллан киирдибит, испииһэккэ ааппытын булларан бүлүтүөн ылан куоластаан бардыбыт. Бастакы быыбардааччынан Иван Николаевич Семенов буолла. 403 №-дээх УИК бэрэссэдээтэлэ Юлия Шадринова: «Бастаан биһиги учаастакпытыгар быыбардааччылар испииһэктэригэр 647 киһи баар этэ. 76 киһи атын сиргэ куоластыыбыт диэн сайабылыаньаларын биэрэн, испииһэктэн таһаарылыннылар, эбии 55 киһи биһиги учаастакка куоластыырын биллэрбитэ.
Онон билигин быыбардааччылар испииһэктэригэр 624 киһи баар. Быыбарга дьон кэлиитэ көхтөөх, эрдэ чаастаах үлэлээхтэр үлэлэригэр баран иһэн таарыйан куоластыыллар, анаан кэлэн быыбардыыр дьон эмиэ баар».
Геннадий Антонов