Сэтинньи 30 күнэ-Саха сиригэр Хомус күнэ. Өбүгэлэрбититтэн бэриллибит ыллыыр чыычаахтаах саха этигэн хомуһа, кини сүрэҕи сүүдүтэр дьүрүскэн тыаһа саха дьонугар эрэ кэрэхсэммэккэ, аан дойдуга тарҕанан олорор араас норуоттар түһүлгэлэригэр,өрөспүүбүлүкэ ыытар улахан тэрээһиннэригэр норуоттары ситимниир, түмэр дьылҕаламмыта хас биирдии саханы үөрдэр.
Бу туһунан биир дойдулаахпыт бөлөһүөк, философскай наука дуоктара, “Хомус” диэн аан дойдутааҕы түмэлин олохтоспут *Ксенофонт Дмитриевич Уткин* маннык суруйбуттааҕа-“Саха хомуһа ырыата ылбаҕайынан, тойуга дорҕооннооҕунан сүүс омук сүрэҕин сүүйдэ, омук дьонун умсугута угуйда”-диэн.
Хаҥалас нэһилиэгэр саха хомуһун, быһаҕын оҥоһуутун өбүгэ бэлэҕин курдук ылынан, Сата тимир уустарын уһанар дьоҕурдарын, сатабылларын, кистэлэҥнэрин сөргүтэн уонна сайыннаран утумнаахтык үлэлэһэ сылдьар киһинэн биир дойдулаахпыт, СӨ норуот уус-уран оҥоһуктарын маастара бэлиэлээх нэһилиэкпит киэн туттуута буолбут Афанасьев Ариан Васильевич Арыйаан Уус-буолар.
Байанай ыйыгар, сэтинньи 30 күнүгэр төрөөбүт Хаҥалас ууһа Ариан Афанасьев-Уус Арыйаан былырыын баччаҕа СӨ Ил Дархана А.С.Николаев* төрүт култуурабытын илдьэ сылдьар, тарҕатар ытык дьоммутугар судаарыстыба таһымыгар өйүүр уурааҕар олоҕуран, Сата уустарын сыдьааныгар Ариан Васильевич ый аайы төлөнөр *Ил Дархан анал стипендиятын ылбыта. Бүгүн биир дойдулаахтара Уус Арыйаан олоҕун биир бэлиэ күнүнэн эҕэрдэлээн туран, Хомуһуҥ дьол туһун хоһуйдун, Айыыһыт арыаллыы сырыттын алгыс тэҥэ тиэрдэн, өбүгэлэргиттэн ылбыт талааҥҥын өссө сайыннаран салҕыы үүнэр көлүөнэҕэ тиэрдиигэ утумнаахтык үлэлииргэр,айар кут, уран оҥоһук, сатабыл кэнчээри ыччакка бэриллэ турдун! ”- диэн баҕа санаабытын тиэрдэбит. Сата тимир уустарын ааттатар уус кыһатын уота инникитин да кытыаста умайарыгар баҕара хаалабыт.
Мария Николаева