Күн-дьыл аастаҕын ахсын ахтыбатахха-санаабатахха, история сорох түгэннэрэ умнуллуон сөптөөхтөр. Ааспыт күһүн Калининград куоракка Саха сириттэн бастакы уонна соҕотох бойобуой летчик дьахтар Вера Захарова үтүө аатын-суолун үйэтитэр геройдар аллеяларыгар мемориальнай дуоска аһыллыыта буолбута.
Ити түгэни ааспыт 2023 сыл биир өйгө-санааҕа хатанан хаалар уонна норуоттар доҕордоһууларын биир бэлиэ түгэнинэн ааҕабын. Ыраах Калиниград куоракка чулуу биир дойдулаахпытыгар мемориальнай дуоска хайдах быһыылаахтык туруоруллубут остуоруйатын кытта ааҕааччыларбын билиһиннэриим.
Биллэрин курдук, Калиниград куоракка Саха сириттэн элбэх биир дойдулаахпыт олохсуйан олорор. Бэс ыйыгар кинилэр Үрүҥ Тунах ыһыах ыспыттарыгар күндү ыалдьыттара «Исхан» мусульманнар түмсүүлэрин салайааччыта, Азербайджантан төрүттээх Явер Гесейнов: «Калининград куоракка араас омук чулуу дьонун, геройдарын үйэтитэр аллея тэрийбитим. Онно эһиги летчик кыыскытын Вера Захарованы киллэрэбин», — диэн үөрүүлээх сонуну иһитиннэрбитэ. Кини тылын дьыалаҕа киллэрэн, Вера Кирилловна аатын-суолун мраморга түһэртэрбитэ.
Туспа омук киһитэ Саха сирин чулуу кыыһыгар сүгүрүйэн, итинник үтүө дьыаланы оҥорбутугар махтаныах эрэ тустаахпыт.
Кистэл буолбатах, бу бэлиэ түгэн иннинэ летчик кыыспыт Вера Захарова туһунан үгүспүт билбэтэ. Ити тэрээһин чулуу кыыспытын өйдүү-саныы сылдьарбытыгар төһүү буолбута саарбаҕа суох.
Ааҕааччыларга бастакы уонна соҕотох летчикпыт Вера Захарова туһунан кылгастык билиһиннэриим. Вера Кирилловна 1920 сыллаахха Өлүөхүмэ оройуонугар күн сирин көрбүтэ. Аҕата Чурапчы Кытаанаҕыттан, ийэтэ Өлүөхүмэ Дэлгэйиттэн төрүттээхтэрэ. Вера Кирилловна — Аҕа дойду сэриитин кыттыылааҕа. Кини 141-с санитарнай авиаполкаҕа сулууспалаабыта. 1944 сылга, билиэҥҥэ түбэһиэр диэри 180 көтүүнү оҥорбута.
Калиниградтан чугас сытар Польша Парусив диэн сириттэн ыараханнык бааһырбыт саллааттары аҕалан истэхтэринэ, кинилэр сөмөлүөттэрин өстөөхтөр суулларбыттара. Вера Захарова билиэҥҥэ түбэспитэ. Билиэнтэн босхолонон баран, салгыы сөмөлүөт штурвалыгар олорбута. Берлиҥҥэ рейхстаг эркинигэр «Захарова из Якутска» диэн сурук хаалларбыта. Бу тиэмэҕэ өссө эргиллэн, ааҕааччыларбытыгар сиһилии билиһиннэриэхпит диэн эрэннэрэбин.
Биллэрин курдук, Кенинсберг (Калиниград) куораты босхолооһуҥҥа 135 саха саллаата олохторун толук уурбуттара. Кинилэр сырдык ааттарын кэриэстээн, Большое Исаково сэлиэнньэҕэ Саха сириттэн кэлбит делегация дойдуларыттан аҕалбыт бэстэри олордубуттара.
Калиниград куоракка чулуу кыыспытыгар, бойобуой летчик Вера Захароваҕа туруоруллубут мемориальнай дуоска итиннэ олорор уонна ыалдьыттыы тиийэр биир дойдулаахтара сүгүрүйэр миэстэлэринэн буолаҕар саарбахтаабаппын.
Людмила НОГОВИЦЫНА.