Алтынньы 25 күнүгэр П.С. Егоров аатынан Акана орто оскуолатыгар үгэс быһыытынан II оройуоннааҕы «Сахалыы эйгэ – оҕо түмсүүтүгэр» коммунарскай түмсүү буолан ааста.
Түмсүү сыала – соруга:
— Оҕо түмсүүтүгэр сахалыы эйгэни сайыннарыы, кэҥэтии;
— Төрөөбүт тыл норуот тылынан уус – уран айымньыта, саха төрүт оонньуулара – норуот барҕа баайа, тыыннаах хаалар суола буоларын өйдөтүү.
Түмсүүнү тэрийэн ыыттылар П.С. Егоров аатынан Акана орто оскуолатын “Дьулус” оҕо түмсүүтэ, Ньурбатааҕы “Ньурба эрэлэ” оҕо общественнай түмсүүтэ.
Коммунарскай түмсүүгэ 11 оскуолаттан 86 оҕо, 13 салайааччы кыттыыны ылла. Кытта кэлбит ыалдьыттары алаадьылаах быырпаҕынан айах туттубут. Тэрээһин үөрүүлээх аһыллыытыгар оскуола дириэктэрэ Екатерина Федоровна Мигалкина, Ньурба улууһун «Ньурба эрэлэ» оҕо общественнай түмсүүтүн бэрэсэдээтэлэ Галифира Николаевна Иванова төрөөбүт тылларын туһугар үлэлэһэр ыччат үксүү турарыгар уонна бүгүҥҥү күн ситиһиилээхтик, айымньылаахтык ааһарыгар баҕа санааларын эттилэр.
Хас биирдии оҕо түмсүүтэ «Саха буоларбынан киэн туттабын» тиэмэҕэ бэйэтин билиһиннэрэн кыттааччылары биир санааҕа сомоҕолуу түмтэ.
«Дьулус» оҕо түмсүүтүттэн баһаатайдар сыһыарыллан Тооку, Ээчэ, Бээчэ, Көөчүк диэн хамаандаларга арахсан үлэлээтилэр.
“Сахалыы эйгэ – оҕо түмсүүтүгэр” бырайыак күрэҕэр барыта 10 оскуола кытынна. Түмсүүлэр дириҥ ис хоһоонноох, суолталаах бырайыактары кэпсээтилэр. Холобур, «Олоҥхо Fest» Ньурбатааҕы элбэх хайысхалаах гимназия, «Билим – остуол оонньуута» Маар орто оскуолата, «Своя игра» Дьиикимдэ орто оскуолата, «Алын кылаас оҕолоругар фестиваль» «Ньурба эрэлэ» оҕо түмсүүтэ уо.д.а. Бу бырайыактар оҕолорго сахалыы эйгэни кэҥэтэргэ, айарга-тутарга элбэх кыаҕы биэриэхтэрэ.
Тэрээһин иккис аҥарыгар «Сахалыы сайа саҥара, толкуйдуу үөрэниэххэ» — этэрээтинэн видеоролик оҥоруута буолла. Видеоролик оҥоруутугар оҕолор саха омук буолалларынан, сахалыы саҥаралларынан, сахалыы толкуйдуулларынан киэн тутталларын биллэрдилэр.
«Биһиги илиибитигэр – сайдыы стратегическай сессия» дьыалабыай оонньууну Ньурба улууһун «Ньурба эрэлэ» оҕо общественнай түмсүүтэ ыытта.
Оонньууга маннык тиэмэлэргэ этэрээтинэн бырайыак оҥордулар:
— Төрөөбүт тылга сыһыаннаах тэрээһиннэрбитигэр төрөппүттэрбитин хайдах кытыннарабыт?
— Төрөөбүт тылга сыһыаннаах тэрээһиннэри хайдах форматтаах тэрийэбит?
— Сахалыы саҥарбат, саҥарыан баҕарбат киһиэхэ төрөөбүт тыл суолтатын «сымнаҕастык» хайдах быһаарабыт?
— Бэйэ икки ардыгар элбэхтик төрөөбүт тылынан кэпсэтэрбитин хайдах ситиһэбит?
«Оҕону сахалыы иитии – тирээн кэлбит кыһалҕабыт» салайааччыларга, төрөппүттэргэ төгүрүк остуол буолла. Төгүрүк остуолу «Сайдам тыл» Ньурба улууһугар төрөөбүт тылларын туһугар туруулаһар, тарҕатар, ситимниир дьон түмсүүтүн бэрэсэдээтэлэ Татьяна Егоровна Александрова уонна Ньурба улууһун үөрэҕириитин иитии–үөрэтии салаатын исписэлииһэ Надежда Васильевна Егорова иилээн–саҕалаан ыыттылар. Оҕону сахалыы тыыҥҥа хайдах иитиэххэ сөптөөҕүн, туохтан саҕалыахха наадатын туһунан бэйэлэрин көрүүлэрин уонна уопуттарыттан билиһиннэрдилэр, кэпсээтилэр.
Оҕолорго оскуолабыт алын кылааһын учуутала Васильев М.Н. “Сахалыы остуол оонньуулара” диэн дьарык ыытта. Оҕолор сахалыы остуол оонньууларын араастарын кытта билистилэр, астына-дуоһуйа оонньоотулар. Тэрээһиммитин «Дьиэрэй ырыам» оскуолалар сахалыы ырыалары гитаранан доҕуһуоллаан ыллаан киэргэттилэр.
Түмүккэ түһүмэхтэринэн миэстэлэр, анал ааттар таҕыстылар. Кыайыылаахтарга добун сурук уонна сэмэй сахалыы бэлэхтэр туттарылыннылар.
«Сахалыы тыыннаах билиһиннэрии»: 1 миэстэ – Ньурба улууһун “Ньурба эрэлэ” оҕо общественнай түмсүүтэ; 2 миэстэ – Ньурбатааҕы техническай лиссиэйин “Компас” оҕо түмсүүтэ; 3 миэстэ – Сүлэ орто оскуолатын “Харысхал” оҕо түмсүүтэ. Муҥутуур кыайыылаах – Акана орто оскуолатын “Дьулус” оҕо түмсүүтэ.
«Сахалыы эйгэ – оҕо түмсүүтүгэр» бырайыак күрэҕэ. 1 миэстэ – Маар орто оскуолатын “Билим – остуол оонньуута” бырайыага; 2 миэстэ – Ньурба улууһун “Ньурба эрэлэ” оҕо общественнай түмсүүтэ “Алын кылаас оҕолоругар бэстибээл” бырайыага; 3 миэстэ – Ньурбатааҕы элбэх хайысхалаах гимназия “Олоҥхо Fest” бырайыага. Муҥутуур кыайыылаах – Дьиикимдэ орто оскуолата «Своя игра» («Дьиикимдэ туһунан төһө билэҕин?») бырайыага. «Бастыҥ видеоролик» — «Тооку» хамаанда, баһаатай Солтуева Мария (Акана орто оскуолата).
«Ырыа куттаах хамаанда» — Сүлэ орто оскуолатын «Харысхал» оҕо түмсүүтэ.
«Сахалыы тыыннаах лиидэр»: Павлова Мария (Антоновка орто оскуолата); Федоров Александр (Марха орто оскуолата); Тимофеев Ратмир (Дьаархан орто оскуолата); Попова Розанна (Ньурбачаан орто оскуолата).
Оройуоннааҕы «Сахалыы эйгэ – оҕо түмсүүтүгэр» коммунарскай түмсүү оҕолорго сахалыы эйгэни кэҥэтэргэ, бэйэ омугунан, тылынан, култууратынан киэн туттарга, салгыы сайыннарарга туһуланан, дириҥ ис хоһоонноохтук ыытылынна. Бу тэрээһин оҕолорго биир умнуллубат кэрэ күн быһыытынан өйдөрүгэр-сүрэхтэригэр хаалыа диэн эрэнэбит.
Анна Соркомова