Муус устар ый 20 күнүгэр Түмүк нэһилиэгин «Алгыс» норуот айымньытын киинигэр СӨ Оҕо саас сылынан, олохтоох бэйэни салайыныы күн чэрчитинэн, Түмүк нэһилиэгин тэрилтэлэрин салайааччылара, депутаттара кыттыылаах нэһилиэкпит элбэх оҕолоох дьиэ кэргэн оҕолорунаан кыттыылаах «Сана кун сырдыгы тускулаа…» сонун кэнсиэр дьоро киэһэтэ буолан ааста.
Кэнсиэр үөрүүлээх аһыллыыта төрөөбүт төрүт түөлбэбит, маанылаах Маарбыт туһунан биир дойдулаахпыт хоһуйбут М.Ходжикулиева тылларыгар уонна матыыбыгар нэһилиэкпит Өрөгөй ырыатын бука бары биир сомоҕо буолан ыллаан саҕалаатыбыт. Түөрт түөрэм туйахтаах, сыспай сиэллээх, төлөннөөх сындыыс тыыннаах, кэпсээҥҥэ киирбит, нэһилиэкпит киэн тутуута сүүрүүк үрүмэччи маҥан аппыт, төрөөбүт түөлбэбит Өрөгөй ырыатыгар дьүөрэлээн биир дойдулаахпыт, уран тарбахтаах иистэнньэҥ Валентина Тимофеевна Баснаева нэһилиэкпит дьаралыгар тигэн хаалларбыт Үрүмэччи маҥан аппыт үйэлэргэ киэн туттуу буола турдун диэн туран Түмүк нэһилиэгин тумус туттар муниципальнай сулууспа улэһиттэрин, депутаттарын,тэрилтэлэрин салайааччыларын толоруутугар «Үрүмэччи маҥан ат» ырыаны ыллаатылар.
Бу бэлиэ күнүнэн нэһилиэкпит сайдыытыгар өр кэмнэргэ эҥкилэ суох таһаарыылаахтык үлэлээбит муниципальнай сулууспа бэтэрээннэрин, үлэлээн ааспыт депутаттары, тэрилтэ салайааччыларын ыҥырыы суругунан маанылаан ыҥыран күндү дьоммутугар ис сүрэхтэн тахсар эҕэрдэ, махтал тыллар бастыҥын анаатыбыт. Түмүк нэһилиэгин тэрилтэлэрин салайааччылара, депутаттара, түөлбэ салайааччылара нэһилиэкпит элбэх оҕолоох ыалларын талба талааннаах оҕолорун кытары бииртэн биир киһи сүргэтин көтөҕөр ырыалары ыллаатылар, хоһоон аахтылар, үҥкүүлээн тэйдилэр. Хас биирдии салайааччы кэнсиэркэ кыттыбыт оҕотугар минньигэс бэлэх туттаран, оҕолор сүрдээҕин үөрдулэр.
Кэнсиэр оһуохай түһүлгэтинэн түмүктэннэ. Нэһилиэкпит олохтоохторо биир санаанан салайтаран, нэһилиэк сайдыылаах, олоҕо уйгулаах буоларыгар бары бииргэ түмсэн үлэлиибит, хамсыыбыт.
«Алгыс» Норуот айымньытын киинэ