Ыраах сытар Хорула нэһилиэгэр 10 киһи тус приемҥа суруттаран сырытта. Ветеринария дьиэтин өрөмүөннээһиҥҥэ, олохтоохтор дьиэлэрин киинтэн ититиигэ холбооһуҥҥа, кэтэх хаһаайыстыбалаахтар сылгы ахсаанын элбэтиигэ, бааһынай хаһаайыстыбалар социальнай хантараак, тиэхиньикэ атыылаһыыга өйөбүл уонна ийэ хапытаалыгар сыһыаннаан туруорустулар.
Нэһилиэнньэҕэ отчуот саҕаланыан иннинэ СӨ Тыа хаһаайыстыбатын уонна ас-үөл бэлиитикэтин миниистирэ Артём Александров Тыа хаһаайыстыбатын сайдыытыгар кылаатын иһин, «Уйгун» СХПК толорооччу дириэктэригэр Александра Анатольевна Николаеваҕа үөрүүлээх быһыыга-майгыга махтал суругу туттарда.
Олохтоохтор тыа хаһаайыстыбатыгар сыһыаннаан сүөһү төбөтүгэр түһэр харчы эрдэ суол сабыллыан иннинэ түһэрэ буоллар, от үлэтин иннинэ от тэрилин атыылаһарга көмө буолуо этэ диэн этии киллэрдилэр.
Ньурба оройуонугар гаастааһын, сири оҥорууга: талаҕы, дулҕаны астарыы , өртөөһүн, хоруулары ыраастааһын үлэтин сөргүтэргэ, оттуур ходуһалары ууттан босхолуур үлэлэри ыытарга, тыа сиригэр оттуур ходуһалаах эрэ буоллахха, сүөһү, сылгы иитиитэ баар буоларын эттилэр. Навесной тэрил ыларга көмө баарын- суоҕун туоһуластылар.
Ааспыт сылга Хорула үс копператива кыттыһан бэйэлэрин күүстэринэн титиик туттубуттарыгар толуйуу көрүллэрин-суоҕун ыйыталыстылар.
ОДьКХ котельнайын кыамтатын үрдэтэн, биитэр саҥа котельнай тутан чугастааҕы ыаллары киинтэн ититиигэ холбуурга этии киирдэ.
Инникитин Хорула нэһилиэгэр таас оскуола, балыыһа тутуута барарыгар баҕа санааларын тиэртилэр. Федеральнай бырагырааманан Хорула оскуолатыгар хаһан өрөмүөн барыаҕын, оҕо уһуйааныгар оҕо ахсаана элбээбитинэн уһуйаанын дьиэтэ кыараан эбии самалык тутуу ыытарга көмөлөһөллөрүгэр, 2013 сыллаахха тутуллубут баһаарынай чаас дьиэтэ саахалланар туруктааҕынан саҥа дьиэ тутулларыгар туруорустулар.
Үөрэҕириигэ сыһыаннаан аныгы көлүөнэ ыччаты патриотическай тыыҥҥа иитиигэ урукку НВП уруогун сөргүтэргэ, оҕо сайыҥҥы сынньалаҥар харчы тиийбэт буолан, сайыҥҥы үлэҕэ 13 эрэ бырыһыан оҕо үлэнэн хабылларынан өрөспүүбүлүкэ эбии үп көрөн оҕолору 50% үлэнэн хабарга этии быһыытынан киллэрдилэр.
Доруобуйа харыстабылыгар туһаайан аптека тыа сирдэригэр суоҕун бэлиэтээтилэр.2027 сылга Ньурбаҕа Манчаары оонньуулара буоларынан сибээстээн, Хорулаҕа спортзал тутуутун туруорустулар
Хорулаҕа ыытыллыбыт отчуокка 72 киһи кытынна, былаас отчуотун биһирээтилэр.
Антонина Семенова