Күндээдэ орто оскуолатыгар убаастанар учуутал, наставник, РСФСР үөрэҕириитин туйгуна, Күндээдэ нэһилиэгин, Ньурба оройуонун бочуоттаах олохтооҕо Степан Гаврильевич Хардарысов аата иҥэриллэр үөрүүлээх тэрээһинэ ахсынньы 5 күнүгэр үрдүк таһымнаахтык ыытылынна.
Үөрүүлээх тэрээһини оскуолабыт оҕолоро Х.Максимов “Учуутал убайбар” ырыатынан күргүөмүнэн ыллаан арыйдылар. Биир бэлиэ түгэнинэн буолла Степан Гаврильевич Хардарысов аатын, үлэлээн ааспыт кэмнэрин, дьоһуннаах олоҕун үйэтитэр стендэ арыллыыта. Стендэни Ньурба оройуонун аҕа баһылыга А.М.Иннокентьев, Күндээдэ оскуолатын директора Т.С.Васильева уонна Степан Гаврильевич оҕолоро, “Үөрэҕирии династиятын” бэлиэ хаһаайыттара, Саха Республикатын үөрэҕириитин туйгуннара Вера Степановна, Любовь Степановна, Степан Степанович астылар.
Үөрүүлээх тэрээһиммит салҕыыта оскуолабыт актовай саалатыгар ааста. Степан Гаврильевич оҕолоро, сиэннэрэ бэйэлэрин махтал уонна кэс тылларын этэн эҕэрдэлэрин тириэртилэр. Оскуолабытыгар саҥа интерактивнай планшет бэлэх ууннулар, ону тэҥэ сылын аайы С.Г.Хардарысов аатынан стипендия ананарын иһитиннэрдилэр. Ньурбабыт улууһун баһылыга А.М.Иннокентьев эҕэрдэлээтэ, оскуолабыт нуучча тылын уонна литературатын учууталыгар Е.И. Саввиноваҕа Ньурба оройуонун дьаһалтатын аатыттан Махтал суругун туттарда. Ньурба оройуонун үөрэҕириитин салалтатын экономикаҕа уонна үпкэ солбуйааччыта Е.Н.Добрецова тахсан эмиэ эҕэрдэ тылын эттэ уонна саха тылын кабинетыгар эбии матырыйаалынан байытарга бэлэммит диэн бэлиэ сурук туттарда.
Оскуолабытыгар өр сылларга кыһамньылаахтык үлэлээн ааспыт английскай тылын учууталыгар Т.Г.Яковлеваҕа “Ньурба оройуонун үөрэҕириитин систематын бочуоттаах бэтэрээнэ” наҕарааданы туоһулуур докумуону уонна түөскэ кэтэр анал бэлиэни уонна математика учууталыгар, билиҥҥэ диэри үлэлии-хамсыы сылдьар А.С.Яковлеваҕа “Ньурба оройуонун үөрэҕириитин систиэмэтигэр кылаатын иһин” анал бэлиэни, ону тэҥэ физкултуураҕа учууталыгар М.Г.Гагаринаҕа Ньурба оройуонун үөрэҕирии салалтатын грамотатын туттарда. Ньурба оройуонун үөрэҕирии үлэһиттэрин идэлээх холбоһуктарын бэрэссэдээтэлэ М.Ю.Таюрскай эҕэрдэлээтэ, ону таһынан махтал суруктарын, сэмэй бэлэҕин Т.Н.Антоноваҕа, А.О.Слепцовка туттартаата.
Күндээдэ нэһилиэгин баһылыга А.Д.Петров эҕэрдэ тылын эттэ, саха тылын уонна литературатын учууталыгар А.А.Александроваҕа, социальнай педагогка Л.М.Николаеваҕа, уруок таһынан эбии үөрэхтээһин учууталыгар Р.В.Борисоваҕа, информатика учууталыгар Н.Д.Обулаховка “Күндээдэ нэһилиэгэ” тыа сирин түөлбэтин дьаһалтатын аатыттан махтал суруктарын туттартаата. Салҕыы бэйэлэрин эҕэрдэлэрин тириэртилэр: Күндээдэ нэһилиэгин дьокутааттарын бэрэссэдээтэлэ А.П.Алексеев, “Кэнчээри” оҕо уһуйаанын кэллэктиибин аатыттан М.В.Петрова, С.Н.Эверстова аатынан “Туску” норуот айымньытын дьиэтиттэн С.М.Яковлева, Күндээдэ орто оскуолатын 1977 сыллаахха бүтэрбит маҥнайгы выпустар, ыраах куораттан ыалдьыппыт Зинаида Прокопьевна Егорова, Шеяттан ыалдьыт, Шея музейын үлэһитэ Октябрина Прокопьевна.
С.Г.Хардарысов аатынан Күндээдэ орто оскуолатын директора Т.С.Васильева бэйэтин махталын, эҕэрдэтин биллэрдэ уонна Махтал суругун туттартаата: директоры үөрэх чааһыгар солбуйааччыга Е.Ф.Варламоваҕа, тэрийээччи-педагогка Н.С.Осиповаҕа. Оскуола профсойууһун кэмитиэтин салайааччыта Л.М.Николаева эмиэ бэйэтин эҕэрдэтин тириэртэ, махтал суругун туттартаата: оскуола библиотекарыгар В.С.Васильеваҕа, А.М.Кураеваҕа, А.Н.Степановаҕа, А.Ю.Самсоновка.
Тэрээһини бэйэлэрин эҕэрдэ ырыаларынан, үҥкүүлэринэн киэргэттилэр оскуолабыт 1-6 кылаас үөрэнээччилэрэ уонна “Кэскил” оҕо үҥкүү ансаамбылын кырачааннара, улахан бөлөхтөрө.
Тэрээһин иккис чааһын “Уруккуну сэгэтэн ахтан, санаан ааһыаҕыҥ” ахтыы дьоро-киэһэтин иилээн ыытта Саха Өрөспүүбүлүкэтин үөрэҕириитин туйгуна, Саха республикатын үтүөлээх оһуохай этээччитэ, Ньурба оройуонун духовнай култууратыгар уонна норуот айымньытыгар ахсаабат кылааттаах, Күндээдэ нэһилиэгин “Үрүҥ көмүс бэлиэ” хаһаайката Г.В.Гурьева. Үөрүүбүтүн тэҥҥэ үллэстэ ыраахтан-чугастан кэлбит ыалдьыттарбыт бэйэлэрин истиҥ эҕэрдэлэрин уонна сэмэй бэлэхтэрин биэрдилэр, учууталларын С.Г.Хардарысовы уонна кини олоҕун аргыһын Л.Е.Филиппованы истиҥник ахтан, санаан аастылар. Быйыл Л.Е.Филиппова төрөөбүтэ 100 сылыгар анаан кыра кыыстара Любовь Степановна альбом-кинигэ таһаартарбытын туһунан кэпсээтэ уонна бэлэх уунна.
Тэрээһини түмүктээн оскуолабыт бэтэрээнэ, өр сылларга саха тылын уонна литературын учууталынан үлэлээн ааспыт Таисия Ивановна Иванова “Билии кыһата” хоһоонугар директоры иитии үлэтигэр солбуйааччы Э.С.Семенова бэйэтин дьүрүлүгэр ырыатын сүрэхтээтэ. Үөрүүлээх тэрээһиммит бэлиэ түгэнин үйэтитэн уопсай хаартыскаҕа түһэн баран бары үөрэ-көтө тарҕастылар. С.Г.Хардарысов оҕолоро, сиэннэрэ тумус туттар аҕаларын, эһэлэрин аата Күндээдэ орто оскуолатыгар иҥэриллибитинэн бэйэлэрин махталларын тириэртилэр.
Директоры иитэр үлэҕэ солбуйааччыта Э.С.Семенова