Билигин хас биирдии улахан бырайыагы олоххо киллэриигэ нэһилиэнньэ төһө көхтөөҕүн эмиэ көрөллөр. Бу ыйынан Россия үрдүнэн ыытыллар ”Табыгастаах куорат эйгэтэ” программа чэрчитинэн ыытыллар куоластааһын түмүктэнэр. Онно, билэрбит курдук, 2 бырайыак киирэ сылдьар. Набережнай 2-с түһүмэҕин оҥоруу уонна Ст.Васильев аатынан уулуссаны саҥардааһын. Бу программанан эрдэ Ньурба Паарката уонна Набережнай оҥоһуллубуттара.
Быйыл болҕомто – Ст.Васильев аатынан уулуссаҕа. Бу саас эмиэ көрдөрбүтүн курдук, массыыналаах да, сатыы да дьон сылдьарыгар хайа да өттүнэн табыгаһа суох. Анал уу сүүрэр ханааба суоҕуттан аспаал, тротуардар сыллата алдьаналлар. Аны туран массыына тохтуур сирэ суоҕа дьоҥҥо эмиэ үгүс мэһэйдэри үөскэтэр. Кэлээскэлээх ийэлэр, бэлэсипиэттээх, сатыы дьон сылдьарыгар анамматах тротуардар үгүс өрөмүөнү эрэйэллэр.
Былаан быһыытынан бу уулуссаҕа Никольскай таҥара дьиэтиттэн Кыайыы 40 сыла уулуссаҕа диэри улахан өрөмүөн үлэтэ барыахтаах.
Муус устар 24 күнүнээҕи туругунан бу куоластааһыҥҥа барыта 5218 киһи кытынна, санаатын этиннэ. Сарсын, муус устар 26 күнүгэр күнүс 16:00 ч.С.Васильев аатынан Паарка павильонугар Ст.Васильев аатынан уулусса тупсарыытын тула общественноһы кытары дьүүллэһии буолар. Бу көрсүһүүгэ Ньурба куорат олохтоохторун, этиллибит уулуссаҕа турар тэрилтэлэр салайааччыларын, үлэһиттэрин, актыбыыстары уонна дойдубут туһугар сүрэҕинэн-быарынан ыалдьар бары көхтөөх олохтоохтору ыҥыраллар.
Лена Петрова