Антоновкатааҕы медпуун аан бастаан кэлбит ыарыһаҕы көрөр эрэ үлэлээх 1955 сыллаахха биир биэксэллээх, биир санитаркалаах тэриллибит. 1969 сыллаахха 10 куойкалаах сытыаран эрэ эмтиир учаастактааҕы балыыһа буолбут. Ол аата, бу балыыһаҕа Ньурбачаан, Сүлэ, Дьиикимдэ нэһилиэнньэлэрэ эмтэнэллэр.
1988 сыллаахха киэҥ-куоҥ, сырдык физиокабинеттардаах, аптекалаах, элбэх медперсоналлаах, 35 куойкалаах балыыһа билиҥҥи арболитовай корпуһа «Ньурба» сопхуос тутан үлэҕэ киирбитэ. Олохтоохтор оччотооҕу сопхуос дириэктэрэ Захаров Алексей Софронович, нэһилиэк Сэбиэтин бэрэссэдээтэлэ Гаврильев Семен Давыдович ааттарын махтана ааттыыллар.
2015 сыллаахха хапытаалынай өрөмүөн баран, аныгылыы көрүҥнэммит. Сайдыахтааҕар, кылгатыы-сарбыйыы политикатыгар оҕустаран, физиокабинеттар, аптека сабыллан, медперсонал аччаан, билигин икки отделениенан холбоон 22 үлэһиттээх, 12 куойкалаах, ол иһигэр 6 — улахан киһи гиэнэ. Балыыһаны терапевт Андреева Евдокия Алексеевна салайар. 4 быраас, сиэстэрэлэр, санитаркалар, онтон да атын үлэһиттэр үөрэ-көтө кэлэн үлэлиир тэрилтэлэрэ.
Ыарыһахтар сытан эмтэнэр балыыһаларыгар 4 симиэнэнэн сылдьан үлэлииллэр. Сиэстэрэлэр Саргылаана, Аня, Зина уонна старшай сиэстэрэ Евдокия быраас тирэхтэрэ, уҥа илиилэрэ, быраас анаабытынан систиэмэ биэрэллэр, укуол туруораллар, эмп тарҕаталлар, давление мээрэйдииллэр. Саамай анаалыс ылалларын биһирээтим. Уопсайынан, балыыһаҕа киирдиҥ да кыһыл оҕолуу бүөбэйдэнэр эбиккин. Санитаркалар Галя, Саргы, Зина, Света барыга бары ырааһы, чэбдик салгыны, аһылыгы түҥэтиини хааччыйалларын таһынан, ыарыһахтары хирургиянан, поликлиниканан араас аппараттарга илдьэн түһэртэрэр эбээһинэстээхтэр. Ыарыһахтары таһарга балыыһа суоппара Алексей, кыһалҕа турдаҕына, бэйэтин да массыынатынан таһар. Балыыһа оробуочайа Бүөккэ кыаммат ыарыһахтары өрө-таҥнары киллэрэн-таһааран, санитаркаҕа көмө буолар. Куукуна үлэһитэ Люция кииннэммит куукунаттан кэлэр аһы ыарыһахтарга палаталарыгар таһар. Үлэһиттэр бары наһаа эйэҕэстэр, “хайдах утуйдуҥ?”, ”хайдаххыный?”, “тоттуҥ дуо?” дии сылдьаллар. Вера диэн маннааҕы медколледжка үөрэнэр кыыс үөрэнэ-үөрэнэ практика барар. Арай аһылык чааһыгар аҕыйах этиилээхпин. Ол, биллэн турар, улуус медсалалтатыгар туһааннаах. Биирэ — мөкү, биирэ — көмүскэл. Ханнык да сир балыыһатыгар сыппыт киһи, ис тутулун өйдөөбөккө эрэ бары биир киһи курдук «балыыһа аһылыга наһаа куһаҕан» диэччилэр. Мин билигин повардары көмүскэһэбин. Күҥҥэ иккитэ араас сылаас хааһы, күнүн аайы сып-сылаас миин, араас торуой, салат, компот эгэлгэтэ, кисиэл, сосиска, халбаһы, кэтилиэт күннээҕи менюттан түспэт. Повардар бэйэлэрэ билэллэринэн астаабаттар. Диетолог суруйбутунан, завхоз тугу киллэрбитинэн бэрт тотоойутук буһараллар. Онон буһарыы, астааһын чааһыгар претензия суох. Куһаҕана, 3 ч. 30 мүн. аһылыгы биэрии бүтэр. Ас күҥҥэ үстэ улуус кииннэммит куукунатыттан кэлэр. Мин санаабар, 6 чааһынан бүтэриэххэ баара. Оҕото-уруута суох ыарыһах кэһэйэр, эмтэммитэ сотуллар. Аны сахарнай диабеттаах киһи хайдах буолар? Аһаабатаҕына, бу киһи уҥар дии. Сүөргүлээмэҥ, билэрбин эттим. Бу ыарыһах уопсай ыарыылаах дьонтон элбэхтик бытарытан аһыахтаах. Аһылык биэрии эрэсиимин улууска көрүөххэ диибин. баҕар, мин билбэтим дуу. Медик — аан дойдуга саамай гуманнай идэ. Идэ буолбакка, айылҕаттан ананыы. Идэтин сөбүлээбэт эбэтэр үлэтигэр ээл-дээл сыһыаннаах киһи эрдэттэн туораан биэриэн наада. Хомойуох иһин, 1-2 оннук киһи баарын билэбин. Ханнык да тутулга сиэстэрэ “сестра милосердия” диэн ааттанааччы. Бу күнүн аайы үлэлэригэр үөрэ-көтө кэлэр үлэһиттэргэ саҥа таас балыыһаны баҕардым. Раковиналаах, унитазтаах, душтаах палаталардаах, автомат таҥас сууйар массыыналаах, иһит сууйар, дьиэ муостатын сууйар массыыналардаах, робот-пылесостаах, массаж, физкультура ыытар, илиини, тарбаҕы эрчийэр, физиотерапевтическэй, диагностическай хостордоох, кафель муосталаах онтон да атын үлэни чэпчэтэр тэриллэрдээх дьиэни баҕарабын. Эбэһээт аптека баар буолуохтаах! Оччоҕо ыарыһах миэстэтигэр быраас анаабыт эмин ылан барыа этэ.
Мирослава ИВАНОВА,
Мэҥэдьэк