Олунньу 10 күнүгэр Ийэ тыл уонна сурук-бичик күнүгэр анаммыт декада чэрчэтинэн Чаппанда модельнай бибилэтиэкэтигэр бибилэтиэкэ уонна уус-уран салайааччы Семенова С. Д. тэрийиилэринэн Арассыыйаҕа Дьиэ кэргэн, СӨ Оҕо саас сылынан “Төрөөбүт тыл абылаҥа” дорҕоонноохтук ааҕыы түһүлгэтин күрэҕэ буолан ааста.
Күрэҕи хомус дьүрүскэн тыаһынан доҕуһуоллатан Юмшанова Н.С. арыйда. Салгыы Антоновкаттан ыҥырыылаах ыалдьыттарбыт “Куочай” түмсүү, биир дойдулаахпыт Клара Васильева хоһоонун ааҕан бэлэх ууннулар.
Күрэхпит дьүүллүүр сүбэтигэр С. П. Алексеев -Буһуут аатынан орто оскуола саха тылын уонна национальнай култуура учуутала Прокопьева М. И., омук тылын учуутала Юмшанова Н.С., Антоновкаттан Баһаарынай сулууспа бэтэрээнэ ,туйгуна ис сулууспа капитаана Данилова С. Н. үлэлээтилэр.
Күрэх түмүгүнэн: Петрова З. П. кыыһынаан Михайлова Тасялыын III-c үрдэли ылары ситистилэр. II-c үрдэлгэ Семенова С. Д. сиэнинээн Архипов Янныын, I-кы үрдэли бырааттыы Сааскылаан, Сандал Громовтар ыллылар.
Анал ааттары ыллылар “Дорҕоонноох ааҕааччы” — Андросов Даниэль, “Хомоҕой тыллаах” ааҕааччылар -Кононова М. Н. уолунаан Кононов Янныын, үс көлүөнэ ааҕааччыларга: эбэлэрэ Иванова К. Е. кыыһынаан Павлова С. А. уонна сиэн кыыһынаан Павлова Сандааралыын «Кылаан» кыайыылаахтарынан буоллулар.
Бары кыттааччылар Добун суруктары, бэлэхтэри туттулар. Бу күн Антоновка нэһилиэгиттэн Данилова Светлана Николаевна саха биир утаҕын “Ымдаан” туһунан кэпсээтэ уонна маастар кылаас көрдөрдө, сүбэлэри биэрдэ. Тэрээһин кыттыылаахтара С. А. Новгородов 1917 сыллаахха бастакы латынныы тылынан тахсыбыт букубаары кытта билистилэр, сахалыы тыл туһугар үлэ туһунан санааларын үллэһиннилэр, кыраайы үөрэтээччи Сидорова Т.Д. хоһоон суруллуутун туһунан бэйэтин санаатын эттэ уонна саҥа буруолуу сылдьар хоһоонун аахта. “Куорсун” литературнай түмсүүттэн Егоров Г. Н. кытынна. Хоһоон хонуута бэрт сэргэхтик, өрө көтөҕүллүүлээхтик ааста.
Тимофеева Е.С., бибилэтиэкэр