Бэҕэһээ Түмүк нэһилиэгэр СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов салайааччылаах оробуочай бөлөх отчуотугар олохтоохтор балыыһа, оскуола тутуутун, аптека боппуруоһун күүскэ туруорустулар. Балыыһа дьиэтэ аварийнай эбийиэктэр испииһэктэригэр киирэн сылдьар, онон бу эбийиэк тутуутун туһунан боротокуолга киллэриллэр буолла. Улуустааҕы киин балыыһа кылааабынай бырааһа Наталья Павлова быйыл Маарга аптека аһылларын туһунан иһитиннэрдэ.
Оскуола тутуута 2027 с. диэри былааҥҥа киирбэккэ сылдьар, үбүлээһин источнига суох. Проектнай-сметнай документацията бэлэм буоллаҕына, федеральнай эбэтэр өрөспүүбүлүкэ бырагырааматыгар киллэрэргэ үлэ барыахтааҕа этилиннэ. 175 миэстэлээх норуот айымньытын дьиэтин тутуу 2027 с. диэри өрөспүүбүлүкэ реестригэр киирэн сылдьар, тыа сирин кэлимник сайыннарыы бырагырааматынан үбүлэниэхтээх. Үрдүк күүрүүлээх уот, олорор дьиэлэри уокка холбооһун кыһалҕата, Үөһээ Бүлүү аннынан муоста тутуута, эдэр исписэлиистэр дьиэ тутталларыгар көмөлөһүү, федеральнай суолу аспааллааһын уо.д.а. боппуруостар киирэн хоруйданнылар. Дьокуускайтан Ленскэйгэ диэри 2030 с. диэри өрүстэргэ муосталар тутуллан киириилэрэ былааннанар. Онон этэҥҥэ буоллаҕына Үөһээ Бүлүү уонна Күндээдэ аннынан муосталар ити кэмҥэ диэри тутуллуохтаахтар.
Ордук элбэх ыйытык тыа хаһаайыстыбатыгар киирдэ. Маардар сүөһү иитиитигэр кэпэрэтиип тэринэр баҕалаахтар, сүбэ-ама көрдөөтүлэр. Уруккута ТХМ иһинэн Сүбэлиир-амалыыр киин, билиҥҥинэн «СӨ агропромышленнай комплексын ресурсанан хааччыйыы киинэ» тэрилтэ салайааччыта Семен Плотников исписэлистэрин ыытан миэстэтигэр үөрэттэриэх буолла. Саха сүөһүтүн иитии туруга хайдаҕын интэриэһиргээтилэр, аһа-үөлэ атыыга тарҕанарыгар баҕаларын эттилэр. Сылгыны нэһилиэктэн тэйиччи күрүөлээн-хаһаалаан иитэр туһунан саҥа сокуон киирээри турара олохтоох усулуобуйаҕа сөп түбэспэтин бэлиэтээтилэр. Манна хоруйдаммытынан, ити сокуон чуолаан соҕуруу, көнньүүһүнэҕэ туруоран иитиллэр сылгыга сыһыаннаах, сыл аҥарыттан ордук мэччирэҥҥэ сылдьар сылгыларга сыһыана суох диэн пууннаах.
Салгыы үөрэх эйгэтигэр учууталлар көмүскэллээх буолуулара мэктиэлэниэхтээҕин, аҥардастыы оҕо бырааба эрэ өрө тутулларын эттилэр. Хочуолунай тутан чааһынай дьиэлэри кииннэммит сылааска холбооһун, үөрэҕи бүтэрбит эдэр исписэлиистэри олохсутан идэлэринэн үлэлэтии, «Сата» мелиоративнай систиэмэтин чөлүгэр түһэрии, Дьокуускайга уонна улуустар кииннэригэр бэйдиэ сылдьар ыттар кыһалҕалара уо.д.а. боппуруостар эмиэ таарылыннылар. Түмүккэ нэһилиэк олохтоохторо өрөспүүбүлүкэ ситэриилээх былааһын отчуотун биһириилллэрин биллэрдилэр.
Геннадий Антонов