🏚 Бүгүн улууска бэлиэ суолталаах түгэн буолла. «Саахалланар туруктаах дьиэттэн көһөрүү» бырагырааманан Ньурба куорат Убайааныгар, Манчаары уул. 8/1 №-гэр 41 кыбартыралааах дьиэ бастакы сыбаайата үөрүүлээхтик түһэрилиннэ. Дьиэ 5 этээстээх уонна 2300 кв.м. иэннээх буолар.
Сахалыы сиэри-туому биллиилээх норуот эмчитэ, алгысчыт, Таркаайы нэһилиэгин бочуоттаах олохтооҕо Алиса Михайловна Иннокентьева толордо. Улуус баһылыгын 1-кы солбуйааччыта Василий Николаевич Семенов истиҥ эҕэрдэ тылыгар тутааччыларга үтүөнү баҕарыыларын тиэртэ, дьиэ 2025 с. үлэҕэ киирэн, элбэх кыбартыыралаах 19 дьиэлэр олохтоохторугар сылаас, үчүгэй уйа буоларыгар баҕа санаатын эттэ. Арассыыйа таһымынан олоххо киирэ турар бырагыраама өссө даҕаны салҕаныаҕын, Ньурбаҕа дьон 50 тыһ. м2 иэннээх эргэ дьиэлэртэн көһөрүллүөхтэрин иһитиннэрдэ. Ньурба сайдар түөлбэтинэн Убайаан буоларын, манна Ньурбатааҕы техникум элбэх эбийиэктэрэ тутуллуохтарын иһитиннэрдэ.
Ньурба к. баһылыга Геннадий Игнатьев быйыл «Саахалланар туруктаах дьиэттэн көһөрүү» бырагырааманан 4 бэдэрээтчит уопсайа 10 тыһ. м2 иэннээх дьиэни тутан үлэҕэ киллэрэллэрин, ол иһигэр «Масстрой» ХЭТ 41 кыбартыыралаах дьиэ тутуутун саҕалыырын эттэ. Улууска үлэлээбитэ ырааппыт «Масстрой» ХЭТ-кэ бу бастакы маннык улахан эбийиэгэ буоларын бэлиэтээтэ уонна тутааччыларга ситиһиилэри баҕарда.
🏗Салгыы «Масстрой» ХЭТ дириэктэрэ Владислав Торохов тыл эттэ. Кини иһитиннэрбитинэн, быйыл дьиэ холлоҕоһун бүтэрэргэ былаанныыллар. Таас үлэтигэр 20-чэ омук дьоно, итиэннэ олохтоохтортон 10-тан тахса киһи үлэлиэхтэрэ.
Үгэс быһыытынан сыбаайа түһэриллиитигэр Владислав Торохов сыбаайаҕа шампанскайы үлтү бырахта. Бу курдук бүгүҥҥү үөрүүлээх тэрээһин түмүктэннэ.
Геннадий Антонов