Бу нэдиэлэҕэ улуус нэһлиэктэринэн уонна Ньурба к. улуус ааспыт сыллаах үлэтин отчуота түмүктэннэ. Бүтэһигэр тохсунньу 30 к. Ньурбаҕа «Кыталык» КД-гар буолбут отчуоттуур мунньахха — 230 киһи, тус көрсүһүүгэ 6 киһи сырытта.
Мунньах саҕаланыыта улуус баһылыга Алексей Иннокентьев үөрүүлээх быһыыга-майгыга Култуура департаменын салайааччыта Розалия Тихоноваҕа – Махтал суругу, Көтөр фабрикатын суоппара Семен Аяровка – «Ньурба улууһун социальнай-экэнэмиичэскэй сайдыытыгар кылаатын иһин», СӨ туйгуна Людмила Яковлеваҕа «Ньурба улууһун култууратын бэтэрээнэ» бэлиэлэри туттарда.
Олохтоохтортон ханна да буоларын курдук, уот мөлтөҕүн, уһуннук арахсыытын, чааһынай дьиэлэри кииннэммит сылааска холбооһун туһунан ыйытыктар киирэн хоруйданнылар. Амакинка түөлбэтин салайааччыта Л.В.Сербина Амакинскай экспедиция скверин көрүү-истии, экспедиция үбүлүөйдээх тэрээһиннэригэр уонна Ньурба куоракка СӨ норуоттарын Ассамблеятын салаатын сөргүтүү туһунан санааларын эттэ. Итини сэргэ СВО-ҕа чааһынай байыаннай формированиеҕа кыттыбыт буойуҥҥа көмө туһунан ыйытык киирдэ.
Ньурба «Западнай» микро-оройуонугар быйыл «Арыылаах» ХЭТ хочуолунайа тутуллуохтаах, манна 50-тан тахса ыал олорор. ОДьКХ Ньурбатааҕы филиала улуус үрдүнэн ааспыт сылга 86 чааһынай дьиэни кииннэммит сылааска холбоото, «Арыылаах» ХЭТ эмиэ элбэх ыалга киллэрдэ. Ньурба куорат түөлбэлэригэр бу курдук сылааһынан хааччыйар тэрилтэлэри кытта үлэлэһэр былаан баар. Амакинскай экспедиция Ньурбаҕа кэлэн олохсуйбута үбүлүөйдээх 70 сылын тэрээһинэ бу сыл муус устар ыйыгар ыытыллыаҕа, кинигэ тахсыахтаах. Түмүккэ куорат олохтоохторо улуус ааспыт сыллаах үлэтин биһирииллэрин биллэрдилэр.
Түмүктээн эттэххэ, улууспут олохтоохторо отчуоттарга көхтөөхтүк кытыннылар. Быйылгы улуус салалтатын отчуоттуур мунньахтарыгар барыта 1548 киһи кытынна. Улуус олохтоохторо улуус ситэриилээх былааһын ааспыт сыллаах үлэтин биһирииллэрин биллэрдилэр, бэйэлэрин этиилэрин уонна туруорсууларын киллэрдилэр.
Геннадий Антонов