Чаппанда нэһилиэгэр ахсынньы 4 күнүгэр ССРС суруналыыстарын уонна суруйааччыларын сойууһун чилиэнэ, оҕо суруйааччыта, бэйиэт, Саха АССР култууратын үтүөлээх үлэһитэ Константин Николаевич Дьячковскай-Көстөкүүн Туйаарыскай 110 сылыгар аналлаах кэрэ-бэлиэ күн буолан ааста.
Сылын ахсын ыытыллар хоһоон уус-уран ааҕыы күрэҕэ С.П. Алексеев — Боһуут аатынан орто оскуолаҕа, оскуола уонна алын кылаас методическай холбоһук тэрийиитинэн, алын сүһүөх 4 кылааһын уолаттарыгар, 12-с төгүлүн ыытылынна. Үөрэх управлениетыттан тэрээһиҥҥэ Апросимова Т.С. кыттыыны ылла.
Эрдэ улуус оскуолаларынан ыытыллыбыт “Уоланнар ааҕыыларын” кыайыылаахтара, бастыҥтан бастыҥнара: Маар, Үөдэй, Антоновка, Хатыы, Ньурбатааҕы гимназия, Чаппанда, Дьаархан, Ньурбатааҕы 3 №-дээх оскуоларыттан кэлэн күрэхтэстилэр. Күрэх сыалынан К.Н.Дьячковскай-Көстөкүүн Туйаарыскай айымньыларын ааҕааччы киэҥ араҥатыгар сырдатыы, сырдык аатын үйэтитии, хоһооннорун тылын-өһүн, ис хоһоонун нөҥүө ийэ тылга кэрэхсэбили үөскэтии, дойдуну, айылҕаны, тыынар-тыыннаҕы харыстыырга, ытыктыырга үөрэтии буолар.
Дьүүллүүр сүбэ кыттааччылары тыллара-өстөрө чуолкайын, уустаан-ураннаан, ис хоhоонун арыйан ааҕалларын, көрөөччүгэ итэҕэтиилээх тиэрдиилэрин сыаналаата.
Күрэх түмүгүнэн кыайыылааҕынан Көстөкүүн Туйаарыскай “Моҕотой тоҕо ытаабытый” хоhоонун чуордук, дорҕоонноохтук ааҕан 1 үрдэл— Тихонов Вова (Ньурба 3 №-дээх наачаалынай оскуолата) 4 «б» кылаас уолана, II үрдэл — Неустроев Гордей “Арай” хоһоону ааҕан (Маар орто оскуолата), 4 кылаас уолана. III үрдэл –Крылов Максим “Үрүҥ куба” хоһоонун ааҕан, (Үөдэй оскуола-саада) 4 кылаас уолана буоллулар.
Уус-уран ааҕыы саамай үрдүк наҕараадатын “Кылаан-чыпчаал ааты” “Дабархай” хоһоону ааҕан Павлов Марк (Ньурба элбэх хайысхалаах гимназията) 4 «б» кылааһын уолана ылла уонна К. Н. Туйаарыскай аатынан Амма улууһун, Абаҕа нэһилиэгин модельнай бибилэтиэкэтэ оҥорон ыыппыт анал суругун Чаппанда нэһилиэгин тыа сирин түөлбэтин баһылыга Бухолов К.Г. үөрүүлээх түгэҥҥэ туттарда.
Чаппанда модельнай бибилэтиэкэтин анал Добун суругун, Чаппанда орто оскуолатын 4 кылааһын уолана Степанов Вася тутта. Бары кыайыылаахтарга анал мэтээллэр, сэмэй бэлэхтэр, бары кыттааччыларга туоһу суруктар, салайааччыларга кинигэ бэлэхтэр туттарылыннылар.
Күрэҕи салайан ыытта Алексеев Н.В., хомус дьүрүскэн тыаһынан киэргэттилэр: Громов Сааскылаан, Семенов Сахаян. Күрэхпит спонсордарыгар махталбытын тиэрдэбит: Олохтоох дьаһалтаҕа, Чаппанда баһылыгар К.Г. Бухоловка. Чаппанда балыыһатын коллективыгар, кыл. быраас В.М. Прокопьева, М.С. Семенов аатынан «Дьоҕур» коллективыгар, директор В.С. Антонова, ГУП ЖКХ Чаппандатааҕы филиалын коллективыгар, салайааччы А.В. Семеновка.
Түмүктээн эттэххэ кыттааччы оҕолор ааҕар маастырыстыбалара сылтан сылын тупсан иһэрин бэлиэтиэххэ сөп. Дэгиттэр талааннаах оҕо суруйааччытын айымньыларын оҕо аймах, кэнчээри ыччат инникитин даҕаны умсугуйан ааҕыа турдаҕа. Суруйааччы норуотун сүрэҕэр өрүү тыыннаах, ол буолар киһи олоххо анала диэн.
Бибилэтиэкэр Тимофеева Е.С., Чаппанда.