Алтынньы 25 күнүгэр Чаппанда нэһилиэгэр М.С.Семенов аатынан «Дьоҕур» норуот айымньытын дьиэтигэр Аан дойду үрдүнэн ыытыллар «Үрүҥ торуоска» аахсыйа чэрчитинэн Ньурба оройуонугар доруобуйаларынан хааччахтаах дьоҥҥо аналлаах тэрээһин Чаппанда, Дьаархан, Хорула нэһилиэктэрэ кыттыылаах ыытылынна.
Доруобуйаларынан хааччахтаах дьоҥҥо социальнай кыһалҕаларын быһаарарга, сыалларын ситиһэллэригэр, көмө оҥорорго анаан Ньурба тэрилтэлэрэ:көрбөттөр уопсастыбаларын бэрэссэдээтэлэ Яковлева С.А., «Мин Докумуоннарым» тэрилтэ исписэлииһэ Иванова С.А., Ньурбатааҕы кииннэммит оройуоннааҕы балыыһа кылаабынай бырааһын солбуйааччыта Анисимов Н.А., Ньурбатааҕы дьарыктаах буолуу киин исписэлииһэ Тихонова Н.А., Ньурбатааҕы социальнай харалта исписэлииһэ Андреева Л.П., инбэлииттэри кытары үлэлиир быраас Захарова Ж.И., «Защитники Отечества» Бүтүн Араассыыйатааҕы фонда соц.координатора Захарова А.Н. кыттыыны ыллылар.
Тэрээһин «Чаппанда нэһилиэк» МТ баһылыга Бухолов К.Г. киирии тылынан аста. Салгыы Көрбөттөр уопсастыбаларын бэрэссэдээтэлэ Яковлева С.А., Иванова С.А. тыл эттилэр.
Аахсыйа түмүгүнэн хараҕынан көрбөт элбэх оҕолоох аҕаҕа Николаев И.И. дьиэтигэр сылдьан, кэпсэтэн, консультация биэрии кэнниттэн 3-с группалаах инбэлиидинэһиттэн 1-кы группаҕа көһөрөргө докумуоннарын оройуоннааҕы врачебнай хамыыһыйа көрүүтүгэр ыытарга быһаарыы ылыллан, аах оҥоһулунна.
«Мин көрөбүн сүрэхпинэн» көрбөт дьоҥҥо аналлаах кинигэ быыстапкатыгар Брайль сириибинэн суруллубут кинигэлэри кытары, аудиокинигэлэр уонна бэйээт, публицист, учуутал, сахаларга бастакы тифлопедагог көрбөттөргө аналлаах Брайль сириибинэн сахалыы алпаабыт ааптара, СӨ култууратын үтүөлээх үлэһитэ, СӨ «Гражданскай килбиэн» бэлиэтин кавалера, СӨ үөрэҕириитин туйгуна, СӨ Суруйааччыларын сойууһун чилиэнэ Иван Николаевич Егоров-Уйбаан Горнай кинигэлэрэ көрдөрүүгэ турдулар. Кэлбит ыалдьыттарга араас сахалыы аралдьытар остуол оонньууларын бибилэтиэкэр Тимофеева Е.С. ыытта. Оонньуулар түмүктэринэн: Андросова А.Т. (Хорула), Алексеева С.В.(Чаппанда), Антонова Т.Г. (Дьаархан) ситиһиилээхтик оонньоон бириистээх миэстэлэри ылан Добун суруктары туттулар. Спортзал үлэһиттэрэ: Николаев М., Иванов И.И. Дартс оонньууга күрэх ыыттылар, күрэх кыайыылаахтара кинигэ бэлэхтэри туттулар. Олохтоох балыыһа терапевт бырааһа Прокопьева В.М. кэлбит дьоннору хааннарын баттааһынан кээмэйдээн , доруобуйаларын туругун көрдө, сүбэлэри биэрдэ.
М.С.Семенов аатынан «Дьоҕур» норуот айымньытын уус-уран салайааччыта Семенова С.Д.кэлбит ыалдьыттары Ийэ декадатын чэрчитинэн музыкальнай эҕэрдэтинэн тэрээһин түмүктэннэ.
Тэрээһин кыттыылаахтара аахсыйа чэрчитинэн доруобуйаларынан хааччахтаах, харахтарынан мөлтөхтүк көрөр дьоҥҥо нэһилиэк аатыттан мэлдьи улахан болҕомто уурулларыгар, күүс-көмө, өйөбүл баар буоларыгар баҕара хааллылар.
Е.С.Тимофеева, Чаппанда.