Таркаайы нэһилиэгин олохтооҕо Анна Осиповна Алексеева көҕүлээһининэн нэһилиэнньэ госпиталларга эмтэнэ сытар байыаннай сулууспалаах уолаттарга диэн биир куул кус, эт, эриллибит эт, барыанньа, 7 хопто отон ыыттылар.
Биһиги Анна Осиповналыын кэпсэтэ сырыттыбыт: «Мин уолум СВО кыттыылааҕа, билигин госпитальга эмтэниини ааһа сылдьар. Ааспыт сыл атаҕар улахан эчэйии ылан турар кыаҕа суох сыттаҕына «Саха-волонтер» түмсүү отой наһаа көмөлөспүтэ. Дойдутун аһынан аһатан, күннэтэ кэлэн көрсөн, наадатыгар сүүрэн-көтөн абыраабыта.
Мин наһаа улахан махталлаахпын байыаннай сулууспалаахтар дьиэ кэргэттэрин Кэмитиэтин салайааччытыгар Светлана Диодорова-Лаврентьеваҕа. Кини ис сүрэҕиттэн биһиги уолаттарбытыгар кыһаллар, биһигини кытары тэбис-тэҥҥэ үөрүүбүтүн-хомолтобутун үллэстэр амарах сүрэхтээх киһи.
Үтүө үтүөнэн төлөнөр, ыҥырыы таһаарбыппар Таркаайым нэһилиэгин түөлбэтэ иилэ хабан ылан, аҕыйах күн иһигэр баһыылка хомуйдубут. Эмтэнэ сытар уолаттарга эриллибит эт наһаа наада, онон тута миэстэтигэр эрийэн ыыттыбыт. Атын даҕаны нэһилиэктэр кыттыһаллара буоллар олус улахан көмө буолуо этэ.
Лена Петрова
Поделиться: