«Зеленый патруль» лааҕыр оҕолоро куорат ыраас, тупсаҕай көрүҥнээх буоларыгар үлэлииллэр

🌿🌿🌿🌷🌼🌻🌺Экологическай хайысхалаах «Зеленый патруль» лааҕырга иллэрээ сыллаахха 14, ааспыт сылга 10 оҕо сылдьыбыт буоллаҕына, быйыл 8 оҕо сылдьар. Үксүн элбэх оҕолоох ийэлэр оҕолоро үлэлииллэр.

Экологическай хабааннаах лааҕыры Ньурба 2 №-дээх оскуолатын географияҕа учуутала, СӨ үөрэҕирии систиэмэтин туйгуна Мария Андреевна Капустина 2000 сылтан салайан үлэлэтэр. Бу иннинэ Мария Андреевна лааҕыра хаппыыста үүннэриитинэн, көрүүтүнэн дьарыктанан кэлбит.

-Үлэбит сүрүнэ сайыҥҥы кэмҥэ оҕону дьарыктаах буоларга үөрэтии. Куораппыт тупсаҕай, ыраас көрүҥнээх буоларыгар сибэкки олордуута, көрүү-харайыы, ырааһырдыы үлэтигэр оҕолор үлэлииллэр, -диэн кылгастык билиһиннэрдэ.

🌺🌻🌼Бэҕэһээ, субуотаҕа энтузиаст учуутал Мария Андреевна лааҕыр оҕолорунаан Степан Васильев аатынан уулуссаҕа баар Советскай Союз геройа Н.Н. Чусовской пааматынньыгар сибэкки олортулар.Лермонтовскай түөлбэ олохтоохторо махталларын биллэрдилэр.

Антонина Семенова