2023 сыл түмүктэрин таһаардылар

Ахсынньы 28 к. эбиэттэн киэһэ Ньурба куорат «Кыталык» КД-гар 2023 с. түмүктэрин таһаарар тэрээһин ыытылынна. Бу күн сааланы ыы-быччары дьон муһунна, өрө көтөҕүллүүлээх уонна үөрүүлээх быһыыга-майгыга улуус баһылыга Алексей Иннокентьев сыллааҕы үлэ сүрүн түмүктэрин туһунан иһитиннэриитэ истилиннэ. Сыл устата үлэлэригэр элбэх ситиһиилэммит туруу үлэһиттэр уонна бэтэрээннэр бэлиэтэннилэр.

Алексей Иннокентьев уонна улуус Сүбэтин бэрэссэдээтэлэ Нюргуяна Михайлова улуус Сүбэтин ахсынньы 27 к. быһаарыытынан улуус бочуоттаах олохтооҕун аата иҥэриллибит Искусство оскуолатын педагога Елизавета Романовна Евсееваҕа уонна «Көмүскэл» волонтерскай сыах салайааччыта Галина Дмитриевна Федороваҕа наҕараадаларын туттардылар.

Үлэ салааларынан «Ньурба улууһун бочуоттаах үлэһиттэрэ» ааттаннылар: муниципальнай сулууспа эйгэтигэр – Чаппанда нэһилиэгин баһылыга Бухолов Краснослав Григорьевич; тыа хаһаайыстыбатыгар — «Влада» кэпэрэтиип суоппар-экспедитора Михайлов Леонид Иванович; үөрэх эйгэтигэр – А.Н.Чусовской аатынан Ньурбатааҕы техлицей нуучча тылын уонна литературатын учуутала Николаева Галина Алексеевна; урбаан уонна эргиэн эйгэтигэр – урбаанньыт Михайлов Виктор Ильич; култуура эйгэтигэр – А.Я. Овчинникова аатынан Антоновкатааҕы «Түhүлгэ» НАДь балетмейстера Васильева Наталья Егоровна; доруобуйа харыстабылын эйгэтигэр – улуустааҕы киин балыыһа хирургия отделениетын медсестрата Долотова Людмила Агафоновна; үп эйгэтигэр – Кииннэммит бухгалтерия сүрүннүүр бухгалтера Иванова Нюргустана Семеновна; тутуу эйгэтигэр — ИСУ салайааччытын солбуйааччыта Матвеева Надежда Васильевна; ОДьКХ уонна энергетика эйгэтигэр – Кировтааҕы чох разреһын бульдозериһа Михайлов Егор Андреевич; социальнай эйгэҕэ – улуус дьаһалтатын эппиэкэҕэ уонна попечительствоҕа отделын кылаабынай исписэлииһэ Алексеева Валерия Валериевна; тырааныспар эйгэтигэр – Ньурбатааҕы техникум тырахтарыыһа Васильев Олег Иннокентьевич; физическэй култуура уонна спорт эйгэтигэр – ДЮСШ ыстаарсай тренер-преподавателэ Мухоплев Адам Алексеевич; быраабы араҥаччылааһын уонна олох-дьаһах куттала суох буолуутун эйгэтигэр – Быыһыыр сулууспа Ньурбатааҕы көрдүүр-быыһыыр этэрээтин салайааччыта Ноев Афанасий Романович; мелиорация, землеустройство, ойуур хаһаайыстыбатын уонна экология эйгэтигэр – Мелиорация управлениетын Ньурбатааҕы филиалын сүрүннүүр инженер-мелиоратора Чымыров Владимир Николаевич; сибээс уонна сонуннары киэҥник тарҕатар сириэстибэлэр эйгэлэригэр — «Ростелеком» ПАО филиалын Ньурбатааҕы Сервиснэй учаастагын универсальнай исписэлииһэ Винокуров Семен Александрович.

СӨ Доруобуйа харыстабылын министиэристибэтин «Судебнай-медицинскэй экспертизатын бюротун» улуустар икки ардыларынааҕы Ньурбатааҕы (Сунтаардааҕы) судебнай-медицинскэй отделениетын быраас-эксперэ Иннокентьев Аскалон Ариановичка, АТП оптуобуһун суоппара Литвиненко Николай Николаевичка уонна Кировтааҕы чох разреһын суоппара Семенов Николай Афанасьевичка «Ньурба улууһун социальна-экэнэмиичэскэй сайдыытыгар кылаатын иһин» бэлиэ туттарылынна.

Салгыы соцконтракка бастыҥ үлэлээхтэр бэлиэтэннилэр. «Бастыҥ социальнай хантараак-2023» номинация кыайыылаахтара — миэбэл оҥорооччу, Чаппанда олохтооҕо Николаев Семен Николаевич («Инбэлииттэргэ аналлаах тосхолунан урбаан үлэтин толоруу» хайысха), Антоновкаҕа дьоҕус контактнай зоопарканы тэриммит Григорьев Дмитрий Егорович («Урбаан үлэтин толоруу»), «Үлэни көрдөөһүн» хайысхаҕа — Хорула ветфельдшерэ Степанов Степан Гаврильевич.

Улуус баһылыга Алексей Иннокентьев судаарыстыбаннай бырагырааманан 2 тулаайах оҕоҕо – Валентин Ивановка уонна Максим Алексеевка атыылаһыллыбыт кыбартыыраларын күлүүстэрин туттарда. Салгыы 2023 с. түмүгүнэн улуус бастыҥ спортсменнара чиэстэннилэр. Тэрээһини эҕэрдэ нүөмэрдэр, «Авокадо» үҥкүү студиятын кырачаан иитиллээччилэрэ киэргэттилэр. Дьон-сэргэ сыл түмүктэрин таһаарар тэрээһин кэмигэр Анал байыаннай эпэрээссийэ кыттыылаахтарын сүһүөхтэригэр туран, күргүөмнээх ытыс тыаһынан истиҥник эҕэрдэлээбиттэрэ олус истиҥник-иһирэхтик көһүннэ.

56 сыл бииргэ олорон кэлбит улуус дьоһун-мааны ыалын быһыытынан биллэр РФ үтүөлээх лесовода Владимир Иванович уонна Варвара Константиновна Саввиновтар Арассыыйаҕа Дьиэ кэргэн сылын бэлиэтин Алексей Иннокентьевка туттардылар. Алексей Михайлович улууска 2024-2025 сс. Олох-дьаһах эйгэтин тупсарыы сылларынан биллэрдэ.

Геннадий Антонов

Читайте дальше