СӨ Ил Дархана Айсен Николаев бүгүҥҥү Туһулаан этиитигэр кэлэр сылы өрөспүүбүлүкэҕэ Ийэ дойдуну көмүскээччи сылынан биллэрдэ.
Бэҕэһээ СВО зонатыгар айаҥҥа турунан, төһө даҕаны ыраах буолларбын, Айсен Сергеевич Туһулаан этиитин болҕойон иһиттим уонна олус биһирээтим. 2025 с. Аҕа дойду Улуу сэриитигэр Улуу Кыайыы өрөгөйдөөх 80 сылын туолар. Саха сириттэн 62 тыһ. тахса киһи ыҥырыллан, уоттаах сэриигэ саа-саадах тутан дойду көҥүлүн уонна чиэһин турууласпыттара. Үгүстэрэ Кыайыы иһин олохторун толук биэрбиттэрэ.
Улуу Кыайыы 80 сылын көрсө, элбэх бэлэмнэнии үлэтэ ыытылла турар. Чуолаан буойуттар уонна тыыл үлэһиттэрин хорсун быһыыларын үйэтитии, тыыл бэтэрээннэригэр уонна СВО кытыылаахтарын дьиэ кэргэттэригэр көмөнү оҥоруу, оҕону-ыччаты патриотическай тыыҥҥа иитии, Ньурба куоракка уонна нэһилиэктэргэ пааматынньыктары, сквердэри саҥардыы – үлэ сүрүн хайысхалара.
Билигин эһэлэрин-хос эһэлэрин килбиэннээх суолларын салҕаан, элбэх киһи Анал байыаннай эпэрээссийэҕэ кытта сылдьаллар. Кинилэргэ бөҕө тыыл буолуохтаахпыт. Кэлэр сыл тосту уларыйыылардаах, Кыайыыны аҕалар сылынан буолуо диэн эрэнэбин. СВО зонатыгар 7-с төгүлүн тиийэн биир дойдулаахтарбытын көрсүөхпүт, дойдуларыттан гуманитарнай көмөнү тиэрдиэхпит.
Бу туһунан улуус баһылыга А.М.Иннокентьев бэйэтин Телеграм-каналыгар суруйда.