Ааспыт нэдиэлэҕэ улуус 6 нэһилиэгэр: Дьиикимдэҕэ, Сүлэҕэ, Күндээдэҕэ, Ньурбачааҥҥа, Чаппандаҕа уонна Чуукаарга аптечнай пууннар аһылыннылар. Нэһилиэктэргэ аптека аһыллыытын улуус дьоно-сэргэтэ туруорсубута уонна кэтэспитэ ыраатта. Хас сылын аайы улуус уонна өрөспүүбүлүкэ ситэриилээх былааһын отчуотугар көтөҕүллэр сытыы боппуруос. Дьон туруорсуута, дьэ, туолан олоххо киирэн иһэр.
Хаалбыт нэһилиэктэргэ улуустааҕы киин балыыһа саҥа салалтата балаҕан ыйын устата аптечнай пууннары аһарга былаанныыр. Оччоҕо тыа сирин олохтоохторо үрдүттэн эми-тому атыылаһан, биир уустук кыһалҕалара быһаарыллыа этэ. Чуолаан бу аҕам саастаах, сырыыны-айаны кыайбат уонна хроническай ыарыылаах дьоҥҥо улахан көдьүүстээх.
Манна даҕатан эттэххэ, бүгүҥҥү улуус салайааччыларын планеркатыгар улуустааҕы киин балыыһа кылаабынай бырааһа Артем Ксенофонтов иһитиннэрбитинэн, улууска хирург, педиатр, анестезиолог, терапевт үлэлии кэллилэр, бу нэдиэлэҕэ эпидемиолог үлэтигэр тахсыахтаах. Хомойуох иһин, Маалыкайга быраас кэм даҕаны көстө илик, 3 нэһилиэги хааччыйан олорор улахан балыыһаҕа ыйга 250 тыһ. солк. хамнастаах бу үлэҕэ баҕалаах билиҥҥитэ суох. «Работа ру» Арассыыйа саайтын нөҥүө быраастары буларга үлэ барар.
Улуустааҕы киин балыыһа хаартыската туһанылынна.
Геннадий АНТОНОВ.