🌞🌞🌞Муус устар 7 күнүгэр Ньурба улууһун Акана нэһилиэгэр «Уруйдан, сандал саас!» сааһы көрсүү бырааһынньыга ыытылынна.
❄❄❄🌞🌞🌞 Томороон тымныылаах кырыа кыһыммыт кыйданан, чаҕылхай күннээх сандал сааспыт кэлбитин уруйдуур бырааһынньыгы ыллам ырыа аргыстаах «Иэйии» дьахтар ансаамбыла, Кира Иванова, Данил Никифоров ылбаҕай ырыаларынан астылар. Түөлбэлэр икки ардыларыгар хорчуоппа күрэҕэр кыттан, олохтоохтор бэринэн-тэринэн араас астаах остуоллары тартылар, казаннарга минньигэс ас арааһын буһаран ыалдьыттары күндүлээтилэр.
Көрүү түмүгүнэн бастакы үрдэли Торохова У.Г. салайааччылаах «Кэнчээри», иккис үрдэли Иванова А.К. салайар «Тускул» түөлбэтэ, үһүс үрдэли Никифорова П.В. эдэр салайааччылаах «Кэскил» түөлбэ ыллылар. Дойдубутугар биллэриллибит Дьиэ кэргэн, Сахабыт сиригэр Оҕо саас сылларынан, өрөспүүбүлүкэбитигэр бэлиэтэнэр Булчут, Аҕа күннэригэр анаан «Аҕа уолунаан» күрэх ыытылынна. Манна үс хамаанда кытынна. Бэрэбинэ эрбээн, мас хайытан, кыстаан, туут хайыһарынан сүүрэн, куобаҕы «бултаһан», хаардаах куулу сүкпүтүнэн сүүрэн күрэхтэстилэр. Кыайыылаахтарынан «Кэнчээри» түөлбэттэн Петр, Рустам Николаевтар тахсан, Солтуев А.Г. салайааччылаах нэһилиэкпит эр дьонун «Эр хоһуун» түмсүүтэ туруорбут сыаналаах бирииһин хаһаайыннарынан буоллулар. Иккис миэстэни Валентин Николаев, Айгылаан Афанасьев ыллылар. Үһүс бириистээх үрдэлгэ ини-бии Григорий, Тимур Барабанскайдар таҕыстылар. Хамаандалар бары мэтээллэринэн, добун суруктарынан, Тойуктаах Марыына аатынан култуура уонна спорт киинэ уонна түөлбэлэр туруорбут бириистэринэн наҕараадаланнылар. П.С. Егоров аатынан Акана орто оскуолатын физкультураҕа учуутала Георгий Семенович Новгородов оскуола 1-7 кылаастарын оҕолорун икки хамаандаҕа арааран көрдөөх оонньууларга күрэхтэһиннэрдэ. Оҕолор минньигэс бириистэри тутан үөрдүлэр-көттүлэр.
🚖 Тимир көлөнү баһылыан баҕалаахтарга биир дойдулаахпыт, «Пегас» автошкола директора Тимофеев Михаил Александрович «Күөх уот» диэн сонун, олус туһалаах күрэҕи ыытта. Күрэххэ ирдэбил быһыытынан 17-тэн үөһээ саастаах, массыына ыытарга үөрэниэн баҕалаах Акана нэһилиэгин 17 эдэр олохтооҕо кыттыыны ылла. Автошкола сатабыллаах инструктордарын салайыыларынан күрэх кыттааччылара массыынаны ыытарга, араас маневрдары оҥорорго холонон көрдүлэр. Кыайыылааҕынан Алексей Шарин буолла уонна «Пегас» автошколаҕа үөрэнэр сертификаты тутан үөрүүтэ үксээтэ.
Кыттааччылартан киирбит усунуос харчытын Михаил Александрович Оҕо саас сылынан сибээстээн үөрэммит П.С.Егоров аатынан Акана орто оскуолатын уһуйааныгар көмө быһыытынан туттаран, биир дойдулаахтарыгар хос үөрүүнү бэлэхтээтэ. Бүгүҥҥү бырааһынньыгы тэрийбит, спонсордаабыт, тэрээһиннэргэ көхтөөхтүк кыттыбыт дьоммутугар-сэргэбитигэр барҕа махталбытын тиэрдэбит, бука барыгытыгар дьолу-соргуну, или-эйэни баҕарабыт!
Акана нэһилиэгин пресс-сулууспата