Бүгүн СӨ Бырабыыталыстыбатын 2 №-дээх дьиэтигэр биир дойдулаахпыт, өрөспүүбүлүкэ биллиилээх судаарыстыбаннай уонна политическай диэйэтэлэ Александр Гаврилович Габышев төрөөбүтэ 125 сылыгар аналлаах СӨ уопсастыбаннаһын үөрүүлээх мунньаҕа буолла.
Улууспутуттан төрүттээх биллиилээх политическай диэйэтэллэр тустарынан бэртээхэй быыстапканы тэрээһин кыттыылаахтара кэрэхсии көрдүлэр. Үөрүүлээх мунньахха элбэх киһи тыл эттэ. Александр Гаврилович Габышев аатын үйэтитиигэ кылаатын иһин А.Г.Габышев туһунан кинигэ ааптара, историческай наука кандидата, Гуманитарнай чинчийии уонна Хоту сир аҕыйах ахсааннаах төрүт норуоттарын проблемаларын институтун сүрүннүүр научнай үлэһитэ Егор Антоновка, СӨ Национальнай архыыбын дириэктэрин солбуйааччыта Наталья Степановаҕа Бочуотунай грамота туттарылынна.
Киэн туттар биир дойдулаахпыт Александр Габышев төрөөбүтэ 125 сылыгар аналлаах өрөспүүбүлүкэ уопсастыбаннаһын мунньаҕар бүгүн олус туһалаах уонна киэҥ кэпсэтии таҕыста.
Бу туһунан улуус баһылыга Алексей Михайлович Иннокентьев бэйэтин Телеграм-каналыгар суруйда.
«Ньурба» хаһыат