Сэтинньи 23 күнүгэр бүтүн Түмүк нэһилиэгин олохтоохторун ытыктабылларын уонна улахан убаастабылларын ылбыт Далбар Хотуннарбыт “Алгыс” эбээлэр түмсүүлэрэ 15 сыллаах үбүлүөйдэринэн “Алгыс” норуот айымньытын киинигэр олус истиҥ, сылаас кэнсиэр тэрийдилэр.
“Алгыс” эбээлэр түмсүүлэрин 2009 с. Валентина Васильевна Егорова тэрийэн, айымньылаахтык салайан нэһилиэкпит социальнай-култуурунай олоҕор күн бүгүҥҥү диэри сөҕүмэр кылааты киллэрэллэр. Түмсүү салайааччыта — СӨ култууратын туйгуна, Ньурба оройуонун кылынан өрүүгэ норуот маастара, Түмүк нэһилиэгин бочуоттаах олохтооҕо, Түмүк нэһилиэгин сыана бэтэрээнэ.
Бу дьоро күн эйэҕэс эбээлэрбит ырыа-үҥкүү түһүлгэтин бэлэхтээтилэр. Кэрэ киэһэни иилээн-саҕалаан ыытта Лена Ивановна Петрова. Эбээлэрбит кэнсиэртэригэр кыттыыны ыллылар “Алаас Хотуна” Хаҥалас нэһилиэгин эбээлэрин түмсүүтэ, “Талбаана” Таркаайы нэһилиэгин эбээлэрин түмсүүтэ, Таркаайы нэһилиэгин кэрэ куоластаах ырыаһыт ымыылара, эбээлэрбит ырыаларын баяҥҥа доҕуһуоллаата Искусство оскуолатын баяниһа Ньургустана Константинова, эбээлэрбитин үҥкүү кэрэ эйгэтигэр уһуйбут Анжелика Седалищева “Сир симэхтэрэ” ансаабылын кытта, эбээлэрбит оҕолоро, сиэннэрэ киэргэттилэр, көрөөччүлэр сүргэлэрин көтөхтүлэр.
Кэнсиэргэ киирбит 17000 харчыны “Алгыс” эбээлэр түмсүү баһаартан эмсэҕэлээбит нэһилиэкпит олохтоохторугар Егоровтар дьиэ кэргэттэригэр анаатылар.
Кэнсиэр кэнниттэн күндү эбээлэрбитин олохтоох дьаһалта, “Алгыс” норуот айымньытын киинэ, нэһилиэк түөлбэлэрэ, бииргэ үлэлээбит дьүөгэлэрэ, доҕотторо, аймахтара, ыалдьыттар үбүлүөйдэринэн эҕэрдэлээн бэлэх эгэлгэтин туттардылар, истиҥ тыллары анаатылар. Дьоро киэһэ эбээлэрбит минньигэс астаах сандалы остуолларынан түмүктэннэ.
Күндү эйэҕэс эбээлэрбит дьон-сэргэ махталын ыла сылдьыҥ, сүүс сааскытыгар диэри бу курдук сүһүөххүтүгэр сылдьан тапталлаах дьоҥҥутун үөрдүҥ. Саҥалыы олохпут долгунун уйунса, кэрэни кэрэхсии, дьиктини биһирии, саҥа күнтэн дьоллоно сылдьыҥ.
“Алгыс” Норуот айымньытын киинэ