«АЛРОСА» Ньурба улууһун сайдыытыгар 1 млрд.солк. ыытыаҕа

Бүгүн Ньурба улууһугар биир суолталаах күн буолла. «АЛРОСА» генеральнай дириэктэрэ Павел Маринычев уонна Ньурба оройуонун баһылыга Алексей Иннокентьев 2025-2027 сс. Ньурба улууһун социальнай-экэнэмиичэскэй сайдыытыгар бииргэ үлэлэһэргэ илии баттастылар.
Быйыл «АЛРОСА» сөбүлэҥ быһыытынан 324,8 мөл.солк. сууманы ыытыаҕа. Хампаанньа Кэтээн көрөр сэбиэтэ бигэргэттэҕинэ, кэлэр икки сылга эмиэ маннык суума кэлиэхтээх, инньэ гынан 3 сыл устата уопсай суумата 1 млрд.солк. тэҥнэһиэхтээх.
«АЛРОСА»-тан киирэр үп туох сыалга барыай?
— тутуу
— саҥардыы
— өрөмүөн
— нэһилиэктэргэ ууну ыраастыыр ыстаансыйалары саҥардыы уо.д.а.
Павел Алексеевич олохтоох дьону үлэнэн хааччыйыы, Ньурба улууһун тыатын хаһаайыстыбатын оҥорон таһаарааччыларын, урбаанньыттарын кытары үлэни тэрилтэ салгыы даҕаны ыытыаҕын эттэ.
Маннык бииргэ үлэлэһии докумуона 2018, 2022 сыллардаахха илии баттана сылдьыбыта. Ол иннинэ 20 сыл устата «АЛРОСА-Ньурба» ААО үбүнэн көмөлөһө сылдьыбыта. «АЛРОСА» тэрилтэни кытары бииргэ үлэлэһии түмүгэр Ньурбаҕа 70 эбийиэк тутулунна, маны таһынан улуус иһинээҕи муниципальнай суоллар өрөмүөннэннилэр уонна асфальтаннылар.
2027 сылга Спортивнай оонньуулары көрсө, элбэх тутуу үлэтэ барыахтаах. СӨ Кэлэр көлүөнэлэрин тус сыаллаах фондатын нөҥүө манна эмиэ 660 мөл. солк. көрүллүбүтэ.
Ньурбатааҕы техникум бульдозеристары, сварщиктары, экскаваторщиктары, суоппардары бэлэмнээн таһаарар. Инникитин үөрэхтэрин бүтэрдэхтэринэ, уопута суохтар уонна разрядтара кыра диэн үлэ булуналларыгар кэккэ ыарахаттары көрсөллөр. Онон «АЛРОСА» тэрилтэ производственнай быраактыкаларын аһардан баран үргүлдьү үлэҕэ ылалларын курдук этии киллэрдилэр. Павел Маринычев бу боппуруоска хайаан да үлэлэһиэхпит, ый иһигэр быһаарыахпыт диэн эрэннэрдэ.
Маны таһынан СӨ норуоттарын IX Спортивнай оонньууларыгар бэлэмнэнии чэрчитинэн Ньурбаҕа «АЛРОСА» Кубогун 2025 с. тустууга уонна 2026 с. оҕунан ытыыга ыытар наадатын туһунан эттилэр.
Павел Маринычев Ньурба улууһа, бастатан туран, «АЛРОСА» акционера буоларын бэлиэтээтэ. Ньурба сиригэр алмааһы хостуур үлэҕэ элбэх олохтоох дьон үлэлиэхтээхтэр, оҥорон таһаарааччылар, урбаанньыттар бородууксуйалара өссө да киирэн, элбээн иһиэхтээх диэн эттэ.

Лена Петрова

Александр Гаврильев хаартыскаҕа түһэриитэ