Октябрьскай нэһилиэккэ бэс ыйын 1 күнүттэн тутуу бара турарынан 2027 сылга ыытыллар норуоттар оонньууларын тыына номнуо баар. Бу күннэргэ нэһилиэк баһылыга Семен Александрович Корякин республикатааҕы А.И. Пахомов аатын сүгэр боксаҕа олимпийскай резервка спортивнай оскуолатын Ньурбатааҕы салаатын салайааччытын кытары Нестер Валериевич Пахомовтуун көрүстэ, бара турар үлэ хаамыытын билистэ.
Интернакка үлэ оргуйан турар. Ыам ыйыттан оттук сезона саҕаланыар диэри бүтэрэрдии көхтөөх үлэ коллектива бэйэ күүһүнэн ремонт ыытар. «Былырыын улууска спорт министерствотын күннэригэр министр Леонид Николаевич Спиридонов интернат туругун билсэн харчы көрөргө соруктаабытын, 3 мөл. 300 тыһ. солк. спорт министерствотыттан кэлбитэ», — диэн кэпсиир Валерий Нестерович. Бу сууммаҕа 550 кв.м. иэҥҥэ тутуу материала ылыллан кырата суох ремонт түмүктэнэн эрэр, муоста уларыйда, үктэллэр саҥардыллаллар, огнезащитнай обработка хаалан турар. Түннүктэри этэр буоллахха – былырыын уларыйбыттар. Ону таһынан сөпкө дьаһанан министерство үбүнэн материальнай өттүттэн хааччыныы, саҥа объекка наадалааҕы ылыы баар: тэрээһин ыытарга акустическай система, 35 миэстэҕэ 35 саҥа орон, штора, карнизтар, пожарнай щит кытары саҥардыллыахтара, столовойга жарочнай шкаф, морозильник, онтон да атын.
Этиллибитин курдук норуоттар спортивнай оонньууларгар олоҕуран спорт министерствотын уонна Ньурба улууһун дьаһалтатын сөбүлэҥнэринэн столовай тутуута ыытыллар. Улуустан 23 мөл. 212 тыһ. көрүллүбүтэ, подрядчик быһыытынан олохтоох тэрилтэ «Стройкомфорт» ХЭТ (гендиректор Анатолий Алексеевич Степанов) аукционы кыайан үлэлии сылдьар, бу сыл ахсынньы 31 күнүгэр түмүктүөхтээх. Объект 300 кв.м. кэриҥнээх, 20х15 м., каркаснай тутуу, биир этээстээх. Тутууга барыта сэттэ киһи үрдүттэн олорон үлэлиир, Забайкальеттан сылдьар нууччалар. Антоновкаҕа иккис объектара эбит. Эрдэ Крахмаллааҕы 150 миэстэлээх хотону эмиэ кинилэр туппуттар. Кииҥҥэ кэллэххэ тутааччылар музыкалара ньиргийэн турар буолар. Иллэҥ кэмҥэ балыктыыллар, өссө баанньык вагончиктаахтар. Валерий Нестерович этэринэн тутааччылар үлэлэрэ үчүгэй, нэһилиэги сөбүлээн сылдьаллар.
Ремонт, тутуу эрэ буолбакка, докумуон үлэтэ эмиэ тохтообот. Уларыйыылар киирэн эбии үөрэхтээһин (дополнительное образование) диэн баар буолбут. Онон, холобур, тренердар аны тренер-преподаватель буолаллар, атын да ирдэбиллэр эбиллэн биэрэллэр. Спортивнай оскуола экспертнай заключение тутан үөрэх дьылыгар бэлэм олорор. Спортсменнар сыл тухары дьарыктаналлар, сайыҥҥы өттүгэр учебнай-тренировачнай сбор ыытыллар. Быйыл ремонт буолан боксердар Хаҥалас улууһугар Еланкаҕа икки сезон лааҕырга сылдьыбыттар. Манна Антоновка оҕолоро эмиэ бааллар. Маны тэҥэ эт-хаан, өй-санаа өттүнэн сайдыы эрэ буолбакка, сиргэ-буорга сыстан улахан олоххо бэлэм буолууга тирэх буолар интернакка теплицалаахтар, хортуоска олордоллор. Былырыын бэйэлэрин оҕуруот астарын оҕолор кыһын ортотугар диэри сиэбиттэр. Уонна билиҥҥи туругунан биир улахан докумуон үлэтэ «Спортивный зал единоборств с интернатом на 50 мест» объект проектааһыыныгар техническай заданиятын бэлэмнээһин, балаҕан ыйын 1 күнүгэр диэри үп-харчы министерствота бигэргэтиэхтээх.
Аны туран саҥа дьиэ үлэҕэ киирдэҕинэ урукку столовой дьылҕата хайдаҕый диэн санаа кэлэр. Бу туһунан Семен Александрович этэр: «Интернат билиҥҥи столовойа нэһилиэкпит биир урукку историческай тутуута, 60-с сыллардааҕы. Манна Артур Иннокентьевич Пахомов, бокс музейын оҥорорго кэпсэтиилэр бааллара. Ол эрэн содержаниятын олохтоох дьаһалта хомойуох иһин уйунар кыаҕа суох, ону тэҥэ дьиэ аварийнай туруктаах. Биллэн турар итинэн тохтообоппут. Антоновканы бокс киэҥҥэ ааттатар, биһиэхэ бокс «спорт номер один». Бу сылларга ыытыллар баараҕай тутууларга аҕыйах квадратнай метр анатан чаҕылхай өйдөбүнньүк оҥорор санаалар бааллар, ону хайаан да ситиһиэхтээхпит».
Октябрьскай нэһилиэк дьаһалтатын пресс-сулууспата