Бу күннэргэ Ньурба көхтөөх ыччатынан толору. Республикаттан эдэр педагогтар, ыччат фестивалын кыттыылаахтара уонна улуустар ыччат түмсүүлэрин холбоһуга «ZEMA» активистара. Кэнники көлүөнэ студеннарыгар «ZEMA» олох устата өйдөбүлгэ хаалбыт сүүрээн. Кинилэр улуустары кэрийэн СВО кыттыылаахтарын дьиэ кэргэннэригэр көмө оҥорорго десант тэриммиттэр.
Бүгүн Антоновкаҕа эмиэ сылдьан аастылар, үс ыалга көмөлөстүлэр: боец уолбут ийэтигэр Илларионова Т.Т. хотон көтүрдүлэр, биир боец уолбут төрөппүттэригэр Александровтарга олбуордарын оҥордулар, өссө биир боец олохтоохпут кэргэнигэр Иванова Т.В. хортуоскатын тээппэлээн биэрдилэр. БОН үлэһиттэрэ сылдьыстылар, дьаһалта трактора окко үлэлиир буолан КУР техникатын уларсан абыраата.
«Оҕолорго улахан махтал. Өр сылларга кыаллыбакка турбут хотоммун көтүрэн биэрдилэр. Оҕолорго ситиһиини баҕарабын», — диэн үллэстэр Тамара Тарасовна. Нэһилиэк баһылыгын солбуйааччыта Александра Михайловна Иванова үлэҕэ үөрүйэх, толлон турбат оҕолор эбит диэн бэлиэтээтэ. Манна бааллар араас улуустартан эдэркээн оҕолор, студеннар. Антоновкаттан ЯПК-ҕа үөрэнэр Нелли Захарова маннык үтүө санаалаах хамсааһыҥҥа баарыттан үөрэ көрдүбүт. «ZEMA»-ларга истиҥ махтал!
Октябрьскай нэһилиэк дьаһалтатын пресс-сулууспата