Бүгүн, сэтинньи 25 күнүгэр, улуус салайааччыларын планеркатыгар Октябрьскай нэһилиэк баһылыга Семен Корякин улуус баһылыгын бастакы солбуйааччыта Василий Семеновка Анал байыаннай эпэрээссийэ кыттыылаахтарыгар уонна кинилэр дьиэ кэргэттэригэр көмө улуустааҕы фондатыгар анаммыт убаһа сэртипикээтин туттарда.
«Октябрьскай нэһилиэк — өрөспүүбүлүкэ улахан нэһилиэктэриттэн биирдэстэрэ буолар. Ол даҕаны быһыытынан нэһилиэкпититтэн элбэх киһи Анал байыаннай эпэрээссийэҕэ кытта сылдьар. Онон нэһилиэк дьаһалтатын, «Октябрьскай нэһилиэги тупсаран оҥоруу» муниципальнай тэрилтэ уонна А.Я.Овчинникова аатынан «Түһүлгэ» норуот айымньытын аатыттан улуустааҕы СВО фондатыгар убаһата этин сэртификээтин туттарабыт», — диэтэ Семен Александрович.
СВО улуустааҕы фондатыгар көмө киириитэ кэнники сэргэхсийэн иһэр. Улуус тэрилтэлэриттэн Мотрена Александровна Иванова салайааччылаах ветуправление кэлэктиибин үлэһиттэрэ манна үтүө холобуру көрдөрөллөр. Кинилэр баҕа өттүнэн сайабылыанньа суруйан ый аайы хамнастарыттан улуустааҕы СВО фондатыгар харчы киллэрэн кыттыһалларын туһунан биллэрбиттэр. Чаппанда оҕолоро кэнсиэртэриттэн киирбит 10000 солк. эмиэ СВО фондатыгар анаатылар. Ааспыт бээтинсэҕэ Аҕа дойдуну көмүскээччилэр дьиэ кэргэттэрин Кэмитиэтин Саха сиринээҕи ыстаабын кытта бииргэ улуустааҕы дьахтар Сэбиэтэ улууска Ийэ ыйын чэрчитинэн Сүлэҕэ «Эрэллээх тыыл — Кыайыыга суол!» патриотическай автопробегы тэрийэн ыытан, СВО фондатыгар уопсайа 49 160 солк. харчыны киллэрдилэр.
Кэлэр ыйга улууспут дэлэгээссийэтэ СВО зонатыгар айанныахтаах, биир дойдулаахтарбытыгар эмиэ наадалаах малы-салы, баһыылкалары тиэрдиэхтэрэ.
Геннадий АНТОНОВ.