Ахсынньы 19 күнүгэр, Дьокуускай куорат «Триумф» спорт уораҕайыгар, биир дойдулаахпыт Арассыыйа уонна СӨ үтүөлээх тренерэ Артур Иннокентьевич Пахомов аатынан Бүтүн Арассыыйатааҕы боксаҕа 15-16 саастаах уолаттарга аһаҕас турнир үөрүүлээх аһыллыыта ыытылынна.
Турнир аһыллыытыгар СӨ Бырабыыталыстыбатын Бэрэссэдээтэлин солбуйааччыта Сергей Местников, Ил Түмэн ыччат дьыалатын, физическэй култуура уонна спорка кэмитиэтин салайааччыта Георгий Балакшин, Ил Түмэн олохтоох салайыныыга сис кэмитиэтин салайааччыта Владимир Прокопьев, СӨ физическэй култуура уонна спорт министирэ Леонид Спиридонов, улуус баһылыгын бастакы солбуйааччыта Василий Семенов, улуустааҕы физическэй култуура уонна спорт управлениетын салайааччыта Роберт Алексеев, боксаҕа Норуоттар икки ардыларынааҕы уонна Арассыыйа категориялаах судьуйа Олег Медведев, Артур Иннокентьевич кэргэнэ Наталья Васильевна, кыыһа Яна Артуровна, сиэнэ Нарыйаана, бииргэ төрөөбүттэрэ Тимур Иннокентьевич, Изамира Иннокентьевна, быраатын Прокопий Иннокентьевич кэргэнэ Людмила Дмитрьевна, аймахтара кыттыыны ыллылар.
Биир дойдулаахпыт, талааннаах ыччаппыт СӨ национальнай тыйаатырын оркестрын солиһа, «Кыл Саха» бөлөх солиһа Дьулустан Никифоров кырыымпа кырылыыр тыаһынан, хомус дорҕоонунан кэлбит ыалдьыттары көрүстүлэр.
Турнир үөрүүлээх аһыллыытын Ньурба оройуонун Култуура департаменын салайааччыта, СӨ култууратын үтүөлээх үлэһитэ, СӨ Аар Дархан этээччи, Ил Дархан стипендиата Розалия Тихонова тойугунан саҕаланна.
Артур Иннокентьевич төрөөбүт-үөскээбит Антоновка нэһилиэгин «Түһүлгэ киэргэллэрэ» образцовай оҕо үҥкүү ансамбылын, СӨ култууратын үтүөлээх үлэһитэ Наталья Егоровна салайааччылаах «Үс саха үөскүөҕэ, түөрт саха төрүөҕэ» үҥкүүнү толорон дьон-сэргэ сэҥээриитин ыллылар.
Бу курдук, Бүтүн Арассыыйа таһымнаах күрэх үөрүүлээх аһыллыытын Ньурбабыт улууһун Култуура департамена (салайааччы Р.М. Тихонова) үрдүк таһымҥа тэрийэн ыыттылар. Ньурбабыт дорҕоонноох тохтор тойуга, кырылыыр кырыымпа тыаһа, хомус алыптаах доҕуһуола, үҥкүү кэрэ абылаҥа барыта түмүллэн көһүннэ.
Олоҕун бүтүннүү боксаҕа анаабыт улуу тренер Артур Иннокентьевич Пахомов аатынан турнир өссө сайдан, үгүс элбэх саҥа талааннар аһыллар, инники кэнчээри ыччаттарбыт кынат анньынар биир улахан күрэхтэрэ буолуо диэн бигэ эрэллээхпит.
Спорт управление пресс-киинэ