Мэҥэдьэккэ Дьиэ кэргэн, Оҕо саас сылын түмүктүүр астык тэрээһин ааста.
2024 сыл Россияҕа Дьиэ кэргэн, Саха сиригэр Оҕо саас сылларынан биллэриллэн араас таһымнаах күрэхтэр сыл устата ыытылыннылар. Бу сылы түмүктээн, 10 оҕолоох Герой ийэ, Мэҥэдьэк нэһилиэгин бочуоттаах олохтооҕо Васильева Елизавета Егоровна сырдык кэриэһигэр аналлаах “Бастыҥ элбэх оҕолоох эдэр ийэ” күрэх үрдүк таһымҥа буолан ааста. Күрэххэ нэһилиэкпит элбэх оҕолоох, талба талааннаах иһирэх эдэр ийэлэрэ кытыннылар: Данилова Танюша Михайловна, сибээс үлэһитэ, Слепцова Мария Васильевна, психолог, Анисимова Любовь Семеновна, психолог, Ксенофонтова Агафья Игоревна, физкультура учуутала.
Далбар хотуттарбыт, күн күбэй ийэлэрбит бэйэлэрин билиһиннэрииттэн саҕалаан, дьарыктарын, талааннарын көрдөрөн, биир күннээх ийэ түбүгүн видеоҕа устан, тапталлаах ийэлэрэ туохха үөрэппитин кэпсээн, «Ийэҕэ аналлаах» ыйытыктарга эппиэттээн, аныгылыы биир тэҥ таҥас «фэмили лук» тиктэн, үрдүк сыанаҕа хаһан да тахсыбатах аҕаларыныын сиэттиһэн, кырачаан оҕолорун сиэтэн тахсыбыттара көрүөххэ астык көстүү буолла.
Бу күрэҕи Елизавета Егоровна тапталлаах оҕолоро күндү ийэлэригэр махтал, ытыктабыл, убаастабыл бэлиэтин көрдөрөн, таптал туоһутун биллэрэн, нэһилиэкпит элбэх оҕолоох эдэр ийэлэрин өйөөн, ийэ аатын, дьиэ кэргэн оруолун үрдэргэ туһулаан тэрийдилэр. Тэрээһини алгыстаах алаадьынан, хоту дойду эмис балыгынан кэлбит дьону күндүлээһининэн саҕаланна.
Елизавета Егоровна тапталлаах ийэ, истиҥ кэргэн, нэһилиэк олоҕун көхтөөх кыттааччыта буоларын, кини чаҕылхай олоҕун туоһулуур араас видеолары, оҕолорун ахтыыларын, кини саамай сөбүлүүр ырыатын күн сирин көрдөрбүт 4 кыталык кыргыттара ыллаан иһитиннэрдилэр, күн күбэй ийэлэрин туһунан истиҥ тыллары эттилэр.
Күрэх дьүүллүүр сүбэтигэр 10 оҕо амарах аҕата Пантелеймон Григорьевич оҕолорунаан, кийиитинээн олордо. Кытаанах сүбэлэһии кэннэ, маннык түмүк таҕыста. “Талба талааннаах ийэ” анал аакка тигистэ 2 боотур уолаттар уонна кырачаан Кира мааны ийэлэрэ Анисимова Любовь Семеновна, “Сайдам ийэ» анал ааты ылла 4 кындыа кыталык кыыс уонна биир мохсоҕол иһирэх ийэлэрэ Ксенофонтова Агафья Игоревна, “Сатабыллаах ийэ” анал ааты ылары ситистэ 3 бухатыыр уол уонна 2 кэрэчээн сибэкки кыргыттар тапталлаах ийэлэрэ Данилова Танюша Михайловна уонна “Бастыҥ элбэх оҕолоох эдэр ийэ” ааты сүктэ 3 бухатыыр уоланнар күн күбэй ийэлэрэ Слепцова Мария Васильевна.
Елизавета Егоровна оҕолоро кыттааччыларга сыаналаах бириистэри, кырачаан оҕолоругар минньигэс бэлэхтэри, ону таһынан, оскуолабыт биир бастыҥ спортсменыгар, үчүгэй үөрэнээччитигэр, кыттааччы Агафья Игоревна уолугар, Сидоров Айталга “Бэс чагда” оҕо сынньанар уонна доруобуйатын бөҕөргөтөр киинигэр путевка туттардылар.
Тэрээһин дириҥ ис хоһоонноох, дьиэ кэргэн сыаннастарын бөҕөргөтүүгэ, харыстыырга, киэҥник тарҕатыыга уонна үгэстэри сыаналыырга туһуланан ыытылынна. Маннык таһымнаах күрэхтэр оҕо-аймах, үүнэр көлүөнэ иитиитигэр улахан суолталаахтар.
Нэһилиэкпитигэр оҕону иитиигэ, дьиэ кэргэни бөҕөргөтүүгэ тус кылааттарын киллэрсибит Елизавета Егоровна, Пантелеймон Григорьевич оҕолоругар, ыччаттарыгар барҕа махталбытын этэбит. Көрөөччүлэр да астыммыттарын, киэн туттубуттарын биллэрэн, ытыс тыаһынан бигэргэттилэр.
Матрена Габышева, Мэҥэдьэк