Ахсынньы 9 күнэ Россияҕа Аҕа дойду Дьоруойун Күнүнэн биллэриллэн турар. Бу ытык күҥҥэ сөп түбэһиннэрэн, дойду араас муннуктарыгар Анал байыаннай дьайыыларга сырдык тыыннара быстыбыт буойун уолаттарга аналлаах тэрээһиннэр ыытылыннылар.
Ол курдук Бордоҥ нэһилиэгэр, «Айар Киин» норуот айымньытын дьиэтин саалатыгар, Анал байыаннай дьайыы толоонугар олоҕун толук уурбут, дьоруойдуу охтубут, «Эр санааланыы» уордьанынан наҕараадаламмыт Бордоҥмут чулуу Уола гвардия ефрейтора Иванов Василий Григорьевич хорсун быһыытын, сырдык аатын үйэтитэр сыаллаах суруллубут кинигэ сүрэхтэниитин тэрээһинэ ыытылынна.
Тэрээһини салайан ыыттылар Степан Васильев аатынан кыраайы үөрэтэр музей директора Наталья Васильевна Егорова уонна Василий учуутала Надежда Григорьевна Григорьева. Кинигэ «Бордоҥ нэһилиэгэ» муниципальнай тэриллии дьаһалтатын көҕүлээһининэн уонна үбүлээһининэн «Моя история. Моя страна. Мой путь» диэн СВО кыттыылаахтарыгар анаммыт серия быһыытынан бастакы кинигэ буолла.
Кинигэбит 8 түһүмэхтэн турда. Семен Александрович Новгородов аатынан «Айар» национальнай кинигэ кыһатын генеральнай директора Август Васильевич Егоровы кытта кэпсэтиини Прокопий Юрьевич, иилиир-сүрүннүүр үлэтин Изабелла Егоровна ыыттылар. Ахтыылары, суруйуулары хомуйдулар Изабелла Егоровна Иванова, Наталья Васильевна Егорова, Анастасия Ивановна Григорьева, Надежда Григорьевна Григорьева. Сааһылаата Надежда Григорьева.
Кинигэ 100 экземплярынан таҕыста. Уопсайа 100-чэкэ ахтыы, суруйуу, хоһоон, хаартыскалар киирдилэр. Хомуйбут матырыйаалларбытын көмпүүтэргэ киллэрии уустук үлэтин, ахтыыларга хаартыскалары сыымайдаан киллэриини, тупсарыытын, дизайнын, силигин ситэрэн, суруйуу ааптарын сэргэхтик көрдөрөн, тупсаҕай көстүүлээх, ис хоһоонноох гына ымпыктаан-чымпыктаан Маргарита Анатольевна оҥордо.
Ол курдук бу кинигэбит кэлэр көлүөнэ ыччаттарбытыгар хорсун санаалаах биир дойдулаахпыт Василий Иванов сырдык мөссүөнүн саната, кэпсии, киэн туттуу санаатын үөскэтэ турарыгар!
Анал байыаннай дьайыыларга сылдьар уолаттарбыт этэҥҥэ төрөөбүт дойдуларыгар тиийэн кэлэллэригэр! Эйэлээх халлаан анныгар ил-эйэ олохтонон, ийэлэр, аҕалар, оҕолор харахтарын уута тохтубатыгар!
Бордоҥ нэһилиэгин пресс-киинэ