Алтынньы 30 күнүгэр Акана с. М.Н. Петрова — Тойуктаах Марыына аатынан култуура киинигэр Ньурба улууһун нэһилиэктэрин икки ардыларыгар Ийэ күнүн чэрчитинэн «Бу сиргэ төрөппүт, бу күнү көрдөрбүт биһиэхэ ийэбит — күн тэҥэ киһибит» эстафета альбомун ыаллыы сытар Хаҥалас нэһилиэгэр туттарыы тэрээһинэ буолан ааста.
Бу альбом сыала – Ньурба улууһун нэһилиэктэрин уулуссаларыгар, тэрилтэлэригэр ааттара иҥэриллибит, төрөөбүт дойдуларын аатын ааттаппыт, улуус дьоно киэн туттар дьахталларын, ийэлэрин сырдатыы, үйэтитии буолар.
“Бу сиргэ төрөппүт, бу күнү көрдөрбүт биһиэхэ ийэбит — күн тэҥэ киһибит” альбом-эстафета туттарыытын тэрээһинин үөрүүлээх чааһыгар икки ыаллыы нэһилиэк баһылыктарын солбуйааччылара Васильева Саргылана Васильевна, Семенов Семен Андреевич эстафета альбомун туттарыстылар.
Бу альбомҥа киэн туттар тойуксуппут, Саха АССР үтүөлээх үлэһитэ М.Н.Петрова-Тойуктаах Марыына аатын үйэтитэн 2010 сыллаахха «Кэнчээри» түөлбэҕэ кини аатын сүгэр уулусса уонна 2009 сыллаахха элбэх аналлаах култуура уонна спорт киинигэр М.Н.Петрова-Тойуктаах Марыына аата иҥэриллибитин сырдатан киллэрдибит. Ыалдьыттары Акана нэһилиэгин ырыа-үҥкүү аргыстаах ийэлэрэ, хоһоон ааҕар «Чолбон» театр куруһуогун оҕолоро эҕэрдэлээтилэр.
Нэһилиэкпит уус тарбахтаах ийэлэр оңоһуктарын быыстапкалара туруорулунна. Хаҥалас нэһилиэгин делегацията Тойуктаах Марыына түмэл хоһугар сырытта. Минньигэс астаах, итии чэйдээх остуол тула олорон, билиҥҥи кэмҥэ сытыырхайан турар “Оҕону ийэ тылынан саҥардыахха” диэн тиэмэ тула, истиҥ сэһэргэһиини, санаа атастаһыытын «Саха саҥата» түмсүү салайааччыта, П.С.Егоров аатынан Акана орто оскуолатын Саха тылын уонна литературатын учуутала, элбэх оҕолоох ийэ Наталья Викторовна Васильева, олохтоох бибилэтиэкэр Евдокия Егоровна Саввинова иилээн-саҕалаан ыыттылар. Тэрээһин түмүгэр Александра Пахомова бенто-торт оҥоруутугар, Ирина Торохова тыҥырах оҥоруутугар маастар кылаас ыыттылар.
Акана нэһилиэгин пресс-киинэ