Бүгүн – улууска өссө биир өрөгөйдөөх түгэн. «Саахалланар туруктаах дьиэлэртэн көһөрүү» тосхолунан Ньурбаҕа Комсомольскай уул. 88 №-дээх, 43 кыбартыыралаах дьиэ аһыллыытын үөрүүлээх тэрээһинэ буолла. Дьиэни улууска элбэх социальнай эбийиэги уонна олорор дьиэни туппут «Региональнай сайдыы» ХЭТ үлэҕэ киллэрдэ. Дьиэ уопсай иэнэ – 2650 квм, оттон олорор иэнэ – 1800 кв. м. Бу тэрилтэ «Саахалланар туруктаах дьиэлэртэн көһөрүү» тосхолунан номнуо 6-с дьиэтэ, эрдэ социальнай бырагырааманан уонна бүддьүөт үлэһиттэригэр аналлаах бырагырааманан 3 дьиэни туппуттара. Инньэ гынан Ньурбаҕа элбэх кыбартыыралаах 9-с олорор дьиэтэ буолар.
Сарсыарда дьиэ аһыллыытын сахалыы сиэрин-туомун биллиилээх норуот эмчитэ, алгысчыт Алиса Иннокентьева ситэрдэ. Аалай лиэнтэни улуус баһылыгын солбуйааччыта Наталия Петрова, Ньурба куорат баһылыга Геннадий Игнатьев уонна «Региональнай сайдыы» ХЭТ салайааччыта Альберт Васильев быстылар, истиҥ тыллардаах эҕэрдэ-махтал тыллара этилиннилэр. Геннадий Игнатьев бэлиэтээбитинэн, бу судаарыстыбаннай бырагыраама үлэлиэҕиттэн Ньурба куоракка номнуо 400-тэн тахса кыбартыыра киирэн, дьоҥҥо күлүүстэрэ туттарылынна. Эһиил 85 уонна 43 кыбартыыралаах дьиэ киирэллэрэ былааннанар.
11 чаастан Н.И.Харитонов-Николай Чуор аатынан «Кыталык» КД фойетыгар үөрүүлээх быһыыга-майгыга Наталия Петрова уонна Ньурба куорат Геннадий Игнатьев соторутааҕыта «СӨ үтүөлээх тутааччыта» бочуоттаах ааты сүкпүт Альберт Алексеевич Васильевка Махтал суругу туттардылар. «Региональнай сайдыы» ХЭТ өрөспүүбүлүкэҕэ биир бастыҥ тутуу тэрилтэтэ буоларын, бу күһүн тэрилтэ федеральнай тосхолунан К.Д.Уткин аатынан Марха орто оскуолатын хапытаалынайдык өрөмүөннээбитин, соторутааҕыта Антоновкаҕа норуот айымньытын саҥа дьиэтин тутан үлэҕэ киллэрбитин эттилэр. Саҥа таас дьиэҕэ кыбартыыра хаһаайыттара күлүүстэрин туттулар.
Степанова Розалия Степановна: «Мин Убайаан Стрижевскай уулуссатын 4 №-дээх дьиэтигэр олорбутум. Туббалыыһаҕа үлэлээммин биэнсийэҕэ тахсыбытым. Биир уоллаахпын, онтум улахан киһи. Быстах кэмҥэ Антоновкаҕа олоробун, билигин саҥа дьиэбэр көһүөм. 1 хостоох кыбартыыраны биэрдилэр. Саҥа таас дьиэҕэ киирээри хас сыл кэтэспитим буолуой, дьэ, ол баҕа санаам туолан саҥа хааччыллыылаах дьиэҕэ тиксэн улаханнык үөрдүм. Ньурба куорат, улуус, өрөспүүбүлүкэ салалтатыгар уонна тутааччыларга улахан махталбын тиэрдэбин».
Артем уонна Юлия Ушкановтар дьиэ кэргэттэрэ, Юлия нолуок сулууспатыгар, Артем «Стаер» автосервискэ үлэлииллэр: «Биһиги Альберт уонна Марк диэн уолаттардаахпыт. Энергетик кыбаартал 5 №-дээх дьиэтигэр олорбуппут. Саҥа дьиэҕэ киирэрбитинэн олус үөрэн-долгуйан турабыт. Саҥа ыалларбытын кэлэн иһэр Саҥа дьылынан эҕэрдэлиибит»!
Мария Николаевна Ли: «Биир оҕолоохпут, Степан Васильев 113 №-дээх дьиэтигэр олорбуппут. Бэйэм хомунаалынай тэрилтэҕэ үлэлиибин. Саҥа дьиэни ылан улаханнык үөрэн турабыт. Туппут тэрилтэҕэ улахан махтал! Өссө даҕаны элбэх дьиэни тута, үүнэ-сайда турдуннар!»
Антонова Валентина Васильевна: Саҥа кыбартыыра биэрэннэр, наһаа үөрэн турабын. Бу иннинэ Энергетик 5 №-дээх дьиэтигэр олордубут. Үөрэ-көтө саҥа таас, сырдык дьиэбэр көһүөм. Бу дьиэни туппут тутааччыларга уонна «Саахалланар туруктаах дьиэлэртэн көһөрүү» бырагыраама олоххо киирэригэр үлэлэһэ сылдьар туһааннаах дьоҥҥо барыларыгар истиҥ махталбытын тиэрдэбит!»
Геннадий АНТОНОВ