Ааһан иһэр сыл хайдах түмүктэнэн иһэрин туһунан биир дойдулаахпытыттан СӨ үтүөлээх артыыһа Маргарита Михайловна Борисоваттан үтүө сонунун үллэстэригэр көрдөспүппэр улгумнук сөбүлэстэ.
-Быйылгы сыл миэхэ олус интэриэһинэй буолла, икки улахан «Маһары» режиссёр С.Потапов, «Үйэлэри уҥуордаан» режиссёр Р.Тараховскай испэктээккэ кытынным.
Биир улахан сонуммунан ТНТ каналга «Полярный 4» сериалга уһуллуум буолар.Сериалга аатырбыт артыыстар Михаил Пореченков, Иван Охлобыстин, Елена Воробей, Катерина Шпица хайдах былаһааккаҕа үлэлииллэрэ дьикти, сонун түгэн буолла, уонна кинилэртэн уопут ылыы буоллаҕа дии… Премьерата бу бүттэ.
Маны таһынан «Саха» НИХК» устубут «Харчы» диэн киинэбит ТЭФИ ылла, бу улахан ситиһии буолар.
-Маргарита Михайловна, инники былааннаргын ааҕааччыларга үллэстиэҥ дуо?
-Артыыс үлэнэн олорор, өссө да араас испэктээктэр тахсаары тураллар. Кэлэр сыл олунньу 14 Тапталлаахтар күннэригэр режиссер В.Макаров күнүгэр «Сахафильм» устубут «Таптал» киинэтигэр уһуллубутум премьерата көстүөхтээх.
-Эһиги дьиэ кэргэн Саҥа Дьыл бырааһынньыгын хайдах көрсөҕүтүй?
-Биһиги дьиэ кэргэн аймахтарбытын кытта үс ыал оҕолордуун көрсөр үгэстээхпит, быйыл да оннук былаанныыбыт.
Оҕолор кыраларыгар таһырдьа тахсан салют ытан оонньоон-көрүлээн салгын сиэн киирэрбит, билигин бары улаатан сэмэйдик сыллааҕы ситиһиилэрбитин, кэлэр сылга туох былааммыт туолуохтааҕын, атын дойдуга олорор оҕолорбутун кытта дуоһуйа кэпсэтэбит.
-Кэлэн иһэр Саҥа Дьыл бырааһынньыгар биир дойдулаахтаргар тугу баҕарыа этигиний?
-Күндү биир дойдулаахтарбын кэлэн иһэр Саҥа дьылынан эҕэрдэлиибин! Саҥа дьыл таһаарыылаах, сырдык кэрэ буоллун, олохпут тубустун, санаабыккыт сатаннын, доруобай эрэ буолуҥ!
-Маргарита Михайловна, үлэҥ быыһыгар быыс булан кэпсэппиккэр махтанабын.
Антонина Семенова