🎄⛄ Быйыл Дьокуускай куоракка Орджоникидзе болуоссатыгар «Саха сирин бриллианнара» норуоттар икки ардыларынааҕы муус оҥоһук күрэҕэ буолан ааспыта. Ньурба Өҥөлдьүтүттэн бырааттыы Герасим, Дмитрий Максимовтар кыттыыны ылан, бастакы-иккис миэстэлэри ылары ситиспиттэрэ. Куйаар ситим нөҥүө Герасим Максимовтыын күрэх туһунан уонна инники былааннар тустарынан кэпсэтиибин ааҕааччыларга тиэрдэбин.⛄
-Биһиги дьиэ кэргэн түөрт бырааттыылар муус оҥоһук дьарыктаахпыт. Сахабыт сиригэр, Арассыыйаҕа ыытыллар күрэхтэргэ кыттабыт, тас дойдуларынан быраатым Егордуун сылдьабыт. Бары түмсэн мууска, маска бииргэ үлэлиибит.
Бу сырыыга кыра бырааппынаан Дмитрийдыын кытынныбыт. Быйылгы күрэх Улуу Кыайыы 80 сылыгар ананан ыытылынна.Уопсайа 6 күннээх күрэх буолта. Бастакы күн блиц-турнир муус күрэҕэр, ол кэнниттэн үс күннээх күҥҥэ сыһыаннаах теманан мууһунан оҥоруу, үсүһүнэн, хаар оҥоһукка бэйэ айан таһаарыытынан күрэх буолбута.
Күрэхтэр түмүктэринэн блиц-турнирга II-c миэстэ, улахан муус оҥоһукка I-кы, хаар оҥоһукпутугар анал номинациянан бэлиэтэммиппит.Инники күрэхтэргэ блиц-турнирга хаста да бастаабыппыт, хаар оҥоһукка эмиэ инники күөҥҥэ, улахан муус оҥоһугу оҥорууга наар иккис миэстэ буоларбыт.
Ааһан иһэр сыл биһиэхэ кэккэ ситиһиилэри аҕалла. Бу сайын Мэҥэ-Хаҥалас Төҥүлүтүгэр бетон скульптура күрэҕэр иккис миэстэ буолбуппут.
Билигин, сыл бүтүүтэ Кытайга Харбин,Чанчунь, Цзямуцы куораттарга симпозиумҥа ыҥырыллан баран эрэбит.
Максимовтар мууһу кыһан оҥоруунан дьарыктаммыттара 14 сыл буолбут. Кинилэргэ инники былаан диэн суох, ханна күрэхтэр ыытыллалларынан ыҥырыы туттахтарына кытталлар.
Герасим Максимовтан: «Дойдугутугар Өҥөлдьөҕө, Ньурбаҕа муус оҥоһук оҥоробуккут дуо?»-диэн ыйытыыбар: «Оҥорон бөҕө кэллэхпит дии. Кэлин барыы-кэлии элбэх буолан, ол кыаллыбат», — диэн эппиэттээбитэ.
-Кэлэн иһэр Саҥа Дьыл дьоммутугар-сэргэбитигэр үтүөнү эрэ аҕаллын.Чэгиэн доруобуйаны, нус-хас олоҕу, баҕа санаалара туоларыгар баҕарабын,- диэн Герасим Максимов түмүктээтэ.
Ити курдук Өҥөлдьө сириттэн төрүттээх тарбахтарыгар дьоҕурдаах бырааттыы Максимовтар мас, муус, хаар оҥоһуктар күрэхтэригэр араас сирдэринэн кыттаннар ситиһиилэнэн кэлэллэр.Төрөөбүт дойдуларын аан дойдуга биллэрдилэр, кинилэргэ инникитин да ситиһиилэр кэлэ туруохтара турдаҕа.
Антонина Семенова