Чаппандаҕа отчуот иннинэ бириэмэ баарына, СӨ Бырабыыталыстыбатын Бэрэссэдээтэлин солбуйааччыта Георгий Михайлович Степанов сыл анараа өттүгэр үлэҕэ киирбит 100 /50 миэстэлээх оскуола-саадыгар сырытта. Оскуола дириэктэрин уонна Орто Халыма, Хаҥалас улуустарыттан кэлэн үлэлии сылдьар предметник учууталлары кытта көрсөн кэпсэттэ. Георгий Михайлович «Сэттэ» тутуу хампаанньата туппут эбийиэгин биһирии көрдө, үөрэнээччилэргэ уонна иитиллээччилэргэ табыгастаах усулуобуйа тэриллибитин бэлиэтээтэ.
Отчуокка «Дьоҕур» норуот айымньытын дьиэтин толору элбэх дьон муһунна. Отчуот тула кэпсэтии, дьүүллэһии көхтөөхтүк барда. Уотунан хааччыйыы, тыа хаһаайыстыбатын, Чаппанда Эбэтигэр ууну киллэрии уо.д.а. боппуруостар киирдилэр.
Мария Хантагарова нэһилиэккэ балыыһа аҕам саастаах дьоҥҥо аналлаах балыыһа быһыытынан үлэлээн испитин эттэ, нэһилиэк киинигэр саҥа балыыһаны туттарар наадатын, дьон тыа сиригэр тохтообот буолбутун, идэлэринэн ыстааһа суох буолан эдэр үлэһиттэр тэрилтэлэргэ үлэлиир кыахтара суоҕун этэ.
Акулина Семенова саҥа дьиэни уокка холбуурга көҥүл ылыы аһара сыаналааҕын бэлиэтээтэ, тыа сиригэр дьон олоҕун чэпчэтэргэ кииннэммит сылааска холбуурга улахан болҕомто ууруллуохтааҕын туруоруста. Түмүккэ биир санаанан Чаппанда олохтоохторо СӨ ситэриилээх былааһын 2023 с. үлэтин биһирииллэрин биллэрдилэр.
Геннадий Антонов