Ыам ыйын 21 күнэ — Саха сиригэр ырыа күнэ. Манна анаан Чуукаардааҕы Е.М Поликарпов аатынан «Эйгэ» норуот айымньытын киинигэр А.Ф.Алексеев аатынан орто оскуола үөрэнээччилэрин отчуоттуур кэнсиэрэ буолла.
Музыкальнай салайааччы Виолетта Попова. Кыһынын араас күрэхтэргэ,фестивалларга кыттыбыт нүөмэрдэртэн кыайыылаахтары сүүмэрдээн кэнсиэр тэриллибит.Көрөөччүлэр сонун, олус үчүгэй кэнсиэри көрдүбүт диэн сөбүлээбиттэрин биллэрэн махтанан тарҕастылар.
Чуукаарга оһуохай күнүгэр
Ыам ыйын 25 күнүгэр Иннокентьев П.П. аатынан култуура уонна сынньалаҥ пааркатыгар Чуукаардааҕы А.Ф.Алексеев аатынан орто оскуола тэрээһининэн сайын кэлбитин көрсөр,үөрэх сылын түмүктүүр, быйыл биллэриллибит оһуохай күнүгэр анаан “Кымыс үрдүн охторуу” уонна үгэс быһыытынан сылын аайы ыытыллар “Туризм” тэрээһиннэрэ буоллулар.
Тэрээһин аһыллыытыгар кылаастар бары сахалыы таҥастаах түһүлгэҕэ парадтаан киирдилэр. Ол кэннэ учууталлар түһүлгэни буруонан арчылаатылар. Салгыы Сэргэн Лэкээрин аал уоту оттон алҕаата. Кылаастарынан түһүлгэ киэргэтиитигэр толору астаах сандалы тэрээһинигэр уонна оһуохай таһаарыытыгар күрэхтэр буоллулар. Степанов Вова уонна Яковлева Күннэй “Өбүгэ быстыбат ситимэ” оһуохай күрэҕин кыайыылаахтарынан буолан добун суругунан уонна Сэргэн Лэкээрин анаабыт 2-лии тыһыынча бириистэринэн наҕараадаланнылар. Кылаастар бары анаммыт түһүлгэлэрин сахалыы оҥоһуктарынан, олбохторунан,чаппараахтарынан кыһаллан киэргэппиттэр, сандалыларга сахалыы ас арааһа тардыллыбыт.
Түһүлгэ киэргэтиитигэр 10 кылаас-I , 6 кылаас –II, 4 кылаас –III миэстэлэргэ тигистилэр. Сандалы күрэҕэр 4 кылаас – I, 10 кылаас- II, 2 кылаас – III миэстэ буоллулар. Миэстэлэспиттэр грамоталарынан уонна араас суумалаах харчынан бириистэринэн наҕараадаланнылар.
Туризмҥа биэс хамаандаҕа хайдан уон түһүмэхтээх күөн күрэс түмүгэр “Саха оҕолоро” –I,” Өлөксөй ыччаттара” – II, “Саха чулуу кэскиллэрэ”-III миэстэлэргэ тиксэн грамоталарынан уонна минньигэс бириистэрнэн бэлиэтэннилэр. Тэрээһиннэргэ кыттыбыттар дуоһуйа сынньаннылар.
Надежда Казакова